Sælar og takk fyrir góðan vef!

 Núna á síðustu metrunum á meðgöngu hef ég tekið inn náttúrulega slökun eða magnesíum drykk sem hægt er að kaupa í apótekum. Þessi drykkur hefur hjálpað mér að vinna á fótapirringi og svo næ ég að slaka betur á fyrir svefninn sem er frekar slitinn þessa dagana. Ekki nóg með það þá hefur þessi drykkur mjög góð áhrif á meltingu og hjálpar við að halda hægðum jöfnum og góðum. Það sem mig langar að vita er eitthvað sem mælir gegn því að ég haldi áfram að drekka þetta eftir að barnið fæðist? Á dunknum stendur að skammtastærð sé 2 tsk. (4,5g) en ég tek yfirleitt bara eina tsk. í eitt glas af vatni á dag sem er kannski helmingur þess magns sem ráðlagður er. Þá inniheldur hver skammtur u.þ.b 325mg. eða 81% af ráðlögðum dagskammti. Minn skammtur er auðvitað helmingi minni. Þetta ætti ekki að hafa nein áhrif á mjólkina eða framleiðslu hennar er það?

M.b.k. Helga.

Sæl og blessuð Helga!

Ég held að það ætti að vera í góðu lagi að halda þessu áfram eftir fæðinguna. En það getur verið að áhrifin verði ekki alveg þau sömu. Nei, þetta ætti ekki að hafa nein áhrif á mjólkina þína.

Gangi þér vel!
Katrín Edda Magnúsdóttir,
ljósmóðir og brjóstagjafaráðgjafi,
11. mars 2012.