Notar mig sem duddu

08.07.2012
Hæ og hó!
Ég er með eina 7 og hálfs mánaða sem drekkur á um þriggja tíma fresti og er farin að borða fjórum sinnum yfir daginn. Ég er dugleg að bjóða henni brjóstið yfir daginn. Stundum vill hún þó brjóstið fram yfir grautinn og þá var mér ráðlagt að gefa henni ekki brjóstið fyrir matmálstímann. Fá hana frekar til að borða og æfa sig að tyggja. Hún liggur þá á brjóstinu þegar hún tekur dúrana sína eða fyrir svefninn á kvöldin. Þannig að hún notar mig pínu til að róa sig niður fyrir svefn. Ég er sem sagt duddan hennar. Hún notar ekki að öðru leyti snuð. Mig langar svo að fara draga úr brjóstagjöfinni en halda eftir einni til tveimur gjöfum þar til hún verður eins árs. Ætli sé ekki best að halda eftir kvöldgjöfinni? Það er lengsta gjöf dagsins og sú sem hún nýtur hvað mest. Hvað með dúrana yfir daginn? Er slæmt að hún noti mig sem dudduna sína?


Sæl og blessuð!
Þetta hljómar ósköp eðlileg hegðun hjá henni. En ef þú vilt fara að draga úr brjóstagjöf þá þarftu að taka út gjafir. Þú tekur bara eina gjöf út og gefur annað í staðinn og býður bara vatn í  glasi á eftir. Þetta endurtekurðu í 4-7 daga þ.e.a.s. það er alltaf sama gjöfin sem er sleppt. Ef þér finnst hún svo vera sátt og brjóstin í lagi þá geturðu tekið út aðra gjöf á öðrum hluta sólarhringsins og látið það gilda í 4-7 daga. Þannig heldurðu áfram þar til eftir standa 1-2 gjafir. Jú, það er rétt hjá þér að það er gott að halda lengst í uppáhaldsgjafirnar. Og nei, hún er ekki að nota þig sem duddu. Hún er að leitast við að fá þá mestu vellíðunartilfinningu sem hún þekkir hjá bestu mömmu í heimi. Þar finnur hún líka mesta öryggið.

Vona að þetta gangi vel.
Katrín Edda Magnúsdóttir,
ljósmóðir og brjóstagjafaráðgjafi,
8. júlí 2012