Spurt og svarað

24. október 2006

Sársauki við brjóstagjöf

Sælar og takk fyrir frábæran vef!

Er með einn 2 og ½ vikna gaur. Brjóstagjöfin gengur ágætlega en hann er voða duglegur að sjúga og hefur verið frá því að hann fæddist. Hins vegar finnst mér alveg agalega vont þegar hann drekkur og hefur verið frá því að ég setti hann fyrst á brjóst. Ég finn fyrir miklum sársauka í brjóstunum þegar hann sýgur og varir hann allan tíman meðan hann sýgur. Ég er ekki með sár á geirvörtunum en á annarri þeirra er nokkurs konar sprunga en það virðist ekki hafa áhrif á sársaukann. Ég bý erlendis og var 2 daga á sjúkrahúsi eftir fæðinguna og þá fékk ég aðstoð við að setja hann á brjóst og sögðu hjúkrunarfræðingarnir þar að hann sygi rétt og lægi rétt við brjóstið. Gæti það hafa breyst síðan ég kom heim? Er þetta eitthvað sem er eðlilegt? Ef svo er má ég þá ekki búast til þess að þetta lagist, því mér er farið að kvíða fyrir hverri gjöf því þetta er svo vont!

Með kveðju, nýbökuð móðir.


Sæl og blessuð nýbakaða móðir!

Í stuttu máli þá er það ekki eðlilegt að sársauki sé alla gjöfina, það er alveg örugglega eitthvað í gangi sem ekki á að vera. Hvað það er get ég ekki ráðið í af þessu bréfi en það er ýmislegt sem kemur til greina. Efst á listann myndi ég setja sveppasýkingu, næst rangt grip, svo sýkingar í sprungum, svo æðasamdrátt o.s.frv. Þetta er ekkert voðalega langur listi en ég nefni þetta til að sýna þér að það er mikilvægt að greina þetta rétt til að fá rétta meðferð. Finndu einhvern sem hefur gott vit á brjóstagjöf og fáðu skoðun.  Með réttri meðferð ættirðu að lagast á 1-4 sólarhringum. Þú átt alls ekki að bíta á jaxlinn og bíða eftir að þetta lagist af sjálfu sér því það gerir það ekki. Það eina sem gerist ef þú bíður er að þetta versnar.

Með von um að þú fáir skjóta og góða hjálp.                   

Kær kveðja,

Katrín Edda Magnúsdóttir,
ljósmóðir og brjóstagjafaráðgjafi,
24. október 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.