Sæl og blessuð.

Það er alltaf erfitt að þurfa að gefa ábót með móðurmjólkinni og vonandi hættirðu því fljótt. Það er aldrei skynsamlegt að mæla brjóstamjólk ofan í börn því hún er í fyrsta lagi mjög breytileg og svo nær pumpa aldrei eins góðri (mikilli) mjólk úr brjósti og barn. Það er þess vegna helst aðeins gert í neyð t.d. ef barnið getur ekki sogið. Börn drekka yfirleitt smærri skammta af brjóstamjólk en þurrmjólk. Það er vegna þess að hún nýtist þeim öll en aðeins hluti af þurrmjólkinni. Af stærri skömmtum þurrmjólkurinnar fer alltaf hluti í ómeltanlegan úrgang. Þess vegna hafa þurrmjólkurbörn meiri hægðir. Þetta skýrir líka að hluta af hverju barn vaknar fyrr eftir brjóstamjólkurgjöf. Hún er auðmelt fyrir þau og þegar hún er fullnýtt þurfa þau meira. Þurrmjólk er erfitt að melta og þá finnst þeim þau vera södd lengur því þau eru að reyna að melta það sem er mjög þungmelt.

Litur brjóstamjólkur er líka mjög breytilegur eftir dögum og dagpörtum. Hún er oftast þannig að fyrst í gjöfinni kemur formjólk sem er þunn og vatnskennd. Hún breytist svo eftir nokkrar mínútur og verður hvítari og þykkari. Hún endar svo með því að verða gulleitari og mjög þykk og næringarrík. Það er ekki alltaf sem pumpur ná þeirri mjólk en hraust barn gerir það auðveldlega.

Þú getur alveg treyst því að brjóstamjólkin er alltaf það besta sem þú getur gefið barninu hvernig sem hún er á litinn og þótt barnið þurfi að fá hana í fleiri skömmtum.

Vona að þér gangi vel.             

Katrín Edda Magnúsdóttir,
brjóstagjafaráðgjafi og ljósmóðir.
4. apríl 2007.