Spurt og svarað

04. ágúst 2004

Stálmi

Sæl!

Maður heyrir mikið talað um stálma en ég finn hvergi neinar upplýsingar um hvað þetta fyrirbæri er í raun og veru. Eins hvort eitthvað sé hægt að gera til að koma í veg fyrir þá? Fá allir svoleiðis og hvað varir það lengi?

Takk fyrir frábæran vef.

.............................................................

Sæl og blessuð!

Orðið stálmi er notað um það aðlögunarferli sem brjóstin fara í gengum þegar broddurinn er að breytast yfir í fullþroska mjólk. Þetta gerist yfirleitt á 2., 3. eða 4. degi eftir fæðingu en getur seinkað ef hægt gengur í byrjun. Ástandið tengist auknu blóðflæði til brjóstanna og bjúgur myndast í vefnum milli mjólkurganganna. Konur fá tilfinningu fyllingar í brjóstin og þau virðast þéttari í sér, jafnvel nokkuð aum. Konur sem fæða fullburða, hraust börn sem eru dugleg að sjúga brjóst fyrstu 2-3 dagana finna yfirleitt lítið eða ekkert fyrir stálma. Konur sem fá slæman stálma (brjóst glerhörð, mjög aum, heit og þrútin) eru oftast með börn sem sjúga sjaldan, lítið, eða illa af einhverjum orsökum eða þau fá snuð og/eða ábót. Þannig að hvort stálmi kemur byggist fyrst og fremst á barninu. Það eina sem þú getur gert til hjálpa er að veita barninu óheftan aðgang að brjóstunum daga og nætur og forðast hvers konar truflanir á brjóstagjöfinni. Besta aðferðin til að draga úr óþægindum af völdum stálma eru svo kaldir bakstrar eftir gjafir.
Stálmi gengur yfir að mestu leyti á u.þ.b. sólarhring og er ástand sem ekki kemur fyrir aftur í þessari ákveðnu brjóstagjöf.

Bestu kveðjur um stálmalausa framtíð.

Katrín Edda Magnúsdóttir, ljósmóðir og  brjóstagjafaráðgjafi - 4. ágúst 2004.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.