Stálmi, sár, plasthattur, brjóstakrem

08.04.2006

Sælar og takk fyrir góða síðu.

Mig langar að vita í hvað langan tíma stálmi er í brjóstunum. Ég er með smá sár á geirvörtunum - á ég að fá mér plasthatt eða bara vera duglegri að nota brjóstakrem.

Kveðja, Olla.


Sæl og blessuð Olla.

Stálmi varir stutt ef rétt er við honum brugðist. Kannski 1 sólarhring með verstu einkennunum en svo getur hann verið nokkra daga að smá fjara út. Ef upphaf brjóstagjafarinnar hefur gengið illa þannig að stálmi hafi náð að verða slæmur getur hann verið 7-10 daga að hverfa alveg. Ef þú ert með smá sár á geirvörtunum er mikilvægast að láta barnið grípa rétt utan um vörtuna til að þau geti gróið. Svo er best að þvo þau vel eftir gjafir og þurrka. Ef þau eru opin þarftu að setja plastfilmu yfir þau milli gjafa til að vernda sárin. Þú átt alls ekki að nota plasthatt þar sem hann tefur gróandann og kennir barninu að taka vitlaust vörtuna. Þú átt heldur ekki að nota brjóstakrem og ef þú hefur verið að gera það þá er rétti tíminn til að hætta því núna.

Með bestu ósk um að allt fari að ganga vel,

Katrín Edda Magnúsdóttir,
ljósmóðir og brjóstagjafaráðgjafi,
8. apríl 2006.