Spurt og svarað

08. janúar 2006

Stífla í brjósti, hætti brjóstagjöf fyrir 2 vikum

Hæ, hæ!

Jæja nú er ég með spurningu. Það eru u.þ.b. 2 vikur síðan ég hætti með dóttur mína á brjósti. Var búin að trappa niður og var bara að gefa henni úr hægra brjóstinu því það vinstra náði sér aldrei á strik og kom því engin mjólk þaðan. Alla vega núna er ég allt í einu komin með stíflu í vinstra brjóstið samt hélt ég að mjólkin væri öll farin þaðan enda brjóstið bara mjúkt og 2 vikur síðan dóttir mín drakk úr því. Ég er búin að vera að fara í heita sturtu og bað og nudda brjóstið vel en ég bara spyr er þetta eðlilegt og á ég að vera að mjólka mig, ég er svo hrædd um að ef ég fer að gera það þá fari bara mjólkurframleiðslan öll í gang aftur. Með von um hjálp.

Kveðja, Kríla-mamma sem var að byrja að vinna aftur :o(

.............................................................................................. 

Sæl og blessuð Kríla-mamma!

Já, þetta getur verið alveg eðlilegt. Það vantar reyndar hjá þér hve lengi þú varst með á brjósti. En þú ert byrjuð að vinna svo ég reikna með því að það séu nokkrir mánuðir. Þetta geta verið svona sein afvenjunarviðbrögð í brjóstvefnum og ættu að hjaðna af sjálfu sér. Það er rétt hjá þér að það er ekki sniðugt að hamast mikið á þessu. Þá geturðu sett framleiðslu í gang aftur og fengið enn frekari vanda í kjölfarið. Þú skalt frekar setja kaldan bakstur á þetta svona tvisvar sinnum á dag. Ef um afmarkaðan stóran hnút er að ræða ættirðu fljótlega að finna minnkun. Ef ekki geturðu látið kíkja á þetta ef þú vilt og fengið hjálp.

Með óskum um gott gengi,

Katrín Edda Magnúsdóttir,
ljósmóðir og brjóstagjafaráðgjafi,
8. janúar 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.