Ljósmóðir.is notar vafrakökur til að bæta notendaupplifun og stuðla að frekari þróun heimasíðunnar.
Upplýsingar um vafrakökur
10. desember 2011
Sælar ljósmæður!
Mig langar til að spyrjast fyrir um eymsli/stíflur í brjóstum á meðgöngu. Ég er núna á 26.viku og er í annað sinn á 2-3 vikum að finna staðbundin eymsli umfram það sem ég hef verið að finna alla meðgönguna. Þetta minnir mig óneitanlega mikið á tilfinninguna þegar ég fyrir rúmum 13 árum ól mitt annað barn og fékk stíflur í brjóstin í upphafi meðgöngu, mikinn hita og endaði á sýklalyfjum, Það sama henti er ég var með frumburð minn á brjósti tveim árum fyrr. En sum sé, núna er ég að fá þess háttar staðbundin eymsli í sama brjóstið. Ég neita því ekki að ég óttast að "lenda" í því sama í væntanlegri brjóstagjöf, það er að fá stíflur. Ég reyni að vera dugleg að halda á mér hita og fara vel með mig. En spurningin er, hvað getur þetta hugsanlega verið? Getur það verið vegna fyrri sögu, að brjóstin séu að "laga" eitthvað sem aflaga hefur farið? Það brjóst sem ég fæ verkina í er sjáanlega minna en hitt og mjólkaði minna á sínum tíma.
Með kveðju"Guðný".
Sæl og blessuð Guðný!
Það er eins og þú hefur upplifað mögulegt að fá brjóstabólgu á meðgöngu. Það er þó afar sjaldgæft. Það er líka eðlilegt að svæði í brjóstinu sem hefur „lent í einhverju“ sé líklegra til að gefa meiri verki. Einmitt vegna þeirrar viðgerðarvinnu sem líkaminn er að vinna og þú minnist á. Það er gott að þú ert á varðbergi við einkennum og farir vel með þig því þá er trúlegt að þú grípir snemma í taumana og ástandið nái því ekki að verða slæmt. Svo er alveg eins víst að það gerist ekkert. Þannig að haltu áfram þínu góða starfi og gangi þér vel.
Katrín Edda Magnúsdóttir,ljósmóðir og brjóstagjafaráðgjafi,10. desember 2011
Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.
Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.
Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.