Spurt og svarað

26. október 2004

Stífluð brjóst

Hvernig lýsir það sér þegar brjóstin stíflast?  Ég á rúmlega 3ja mánaða barn og undanfarið hefur mér verið illt í öðru brjóstinu sérstaklega við og eftir gjafir, geirvartan verður stíf/hörð og mig svíður svolítið eftir gjöf. Hvað er til ráða?

.....................................................

Sæl og blessuð.
Þú biður um lýsingu á því þegar brjóst stíflast. Ég ætla að gera það. En í eins stuttu máli og ég get því að ég held að það sé alls ekki það sem hrjáir þig. Undanfari stíflu er yfirleitt að barnið sýgur ekki eins vel og venjulega úr öðru eða báðum brjóstum (af einhverjum ástæðum). Síðan myndast þroti í brjóstvefnum sem þrengir að mjólkurgöngunum utanfrá. Þetta veldur tregara rennsli gegnum svæðið sem getur hvatt meiri þrota. Þennan þrota finna konur sem þéttingu eða hnút inni í brjóstinu. Svæðið er gjarnan aumt og það geta komið roðablettir eða samfelldur roði á húðina yfir svæðinu. Fljótlega í kjölfarið fær konan hita 37.8°-38.8°. Þegar hitinn er að rjúka upp fær konan gjarnan kuldahroll. Svo fylgja hliðarverkanir hita svo sem höfuðverkur, beinverkir og slappleiki. Þetta eru byrjunareinkenni brjóstastíflu. Ég ætla ekki að fara út í alvarlegri einkenni því ég reikna með því að þú sért þegar búin að sjá að þetta er allt annað en þú ert að glíma við.
Algengast er að verkir eða óþægindi sem eru alveg bundin gjafatímunum séu í tengslum við geirvörturnar. Það getur verið rangt grip, rangt sog, sýkingar, húðsjúkdómar og margt fleira. Fyrr eða síðar gefur það gjarnan verki sem leiða inn í brjóstið. Þú skalt athuga að vörtuvandamál eru oft bara öðru megin. Þú nefnir líka sviða eftir gjöf sem er eitt einkenna sveppasýkingar. En athugaðu að sviði eftir gjöf getur líka tengst öðrum vandamálum á geirvörtum.
Það sem er til ráða er að leita aðstoðar. Þú þarft að finna fagaðila sem er vanur brjóstavandamálum og fá bæði viðtal og skoðun. Drífðu í því. Vandamál á geirvörtum lagast sjaldnast af sjálfu sér og þau geta versnað mjög hratt.

Með von um skjóta meðferð og bata,

Katrín Edda Magnúsdóttir,
ljósmóðir og brjóstagjafaráðgjafi,
25. október 2004.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.