Spurt og svarað

01. júní 2007

Vítamín og brjóstagjöf

Sæl!

Ég las vefinn mikið á meðgöngunni og hann nýttist mér mjög vel svo ég vil byrja á að þakka fyrir góðan upplýsingagrunn. Ég las fyrirspurnirnar um vítamín og brjóstagjafir en mig langar að spyrja hvaða vítamín er best að taka þegar maður er með barn á brjósti. Tók „Með barni“ alla meðgönguna og langar að hafa brjóstamjólkina sem besta fyrir litlu dúlluna mína sem er viku gömul. Ég veit ekki alveg hvaða vítamín hentar best núna, hvort það er lýsi og þetta omega-3 dæmi eða hvort maður á að taka einhverjar fjölvítamíntöflur eða kannski bara eitthvað allt annað.

Með von um svar.


Sæl og blessuð.

Svarið við þessu er kannski ekki svo einfalt. Þörf fyrir vítamín og önnur snefilefni fer eftir því hve mikið er af þeim í almennu fæði hverrar manneskju. Með auknu framboði á fjölbreyttu fæði fer þörf fyrir aukavítamín minnkandi. Á hinn bóginn er fólk misduglegt að borða fjölbreytt fæði og þá geta töflur hjálpað. Við hér á norðurhjara fáum mjög litla birtu á okkur í marga mánuði samfellt yfir veturinn. Þá er hætta á að okkur fari að vanta D-vítamín í kroppinn. Þess vegna er lýsistaka talin mjög góð fyrir okkur. Það er hins vegar enginn vandi fyrir okkur að fá önnur vítamín og steinefni ef við borðum hollt fæði. Ef fæðið er hins vegar lélegt er ágætt að taka eins og eina fjölvítamíntöflu daglega.

Vona að þetta hjálpi.         


Kær kveðja,

Katrín Edda Magnúsdóttir,
ljósmóðir og brjóstagjafaráðgjafi,
31. maí 2007.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.