Spurt og svarað

06. október 2010

Þurftamikill og lengi að drekka

Sælar og takk fyrir vefinn
Ég er í smá vandræðum. Drengurinn minn er tíu vikna og mjög kröftugur og þurftafrekur. Hann drekkur um 12 sinnum á sólarhring og er frekar lengi að drekka, yfirleitt ca 45 mínútur í senn. Þetta gengur í sjálfu sér allt ágætlega en ég er orðin dálítið þreytt á að hafa hann svona mikið á brjósti. Þetta gera jú ca 9 klukkutíma á sólarhring og bara rúmur klukkutími á milli gjafa yfir daginn. Er eitthvað sem ég get gert til að fá hann til að drekka hraðar? Eða getur verið að mjólkin renni svona hægt eða hún sé ekki nægileg? Í upphafi gjafa er hann allavega stundum í vandræðum þegar mjólkin kemur hratt svo ég hef það frekar á tilfinningunni að hann sé "slow drinker". Ég hef reynt að kreista brjóstið upp í hann en finnst það ekkert flýta fyrir. Í 9 vikna skoðuninni hafði hann þyngst um rúm 2100g frá fæðingu en þó hefur hann hlutfallslega lengst hraðar miðað við vaxtarkúrfur og er frekar grannur og spengilegur, þó alls ekki neitt horaður.
 
Sæl og blessuð!
Það er alltaf svolítið misjafnt hvaða mynstur börnum hentar hverju og einu. Það hefur yfirleitt ekkert með framleiðslugetu að gera eða hraða mjólkurflæðis. Þetta finnst mörgum hafa meira með karakter hvers barns að gera. Þú gætir alveg eins eignast annað barn sem drekkur aldrei lengur en 10 mín. Þetta virðist vera það mynstur sem hentar þessu barni núna. Það getur svo breyst án þess að þú gerir nokkuð. Ef þú vilt reyna að breyta því er ýmislegt sem þú getur prófað. Þér er alveg óhætt að nota þitt eigið ímyndunarafl til þess. Þú gætir prófað að taka hann af eftir 30 mín. og sett hann í sling, þú gætir prófað að bjóða hitt brjóstið eftir 20 mín. eða prófað eitthvað annað. Það er í sjálfu sér ekkert mynstrinu hans en ef þú vilt reyna að breyta því þá er það allt í lagi.
Bestu kveðjur.
Katrín Edda Magnúsdóttir,
ljósmóðir og brjóstagjafaráðgjafi,
6. október 2010.
 




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.