Spurt og svarað

16. janúar 2009

Eftir legvatnsástungu

Sæl og takk fyrir fræðilegan og góðan vef.

Þannig er mál með vexti að ég fór í legvatnsástungu fyrir viku síðan. Mér hafði kviðið mikið fyrir - en þetta var miklu minna mál en ég hélt og fann ég ekki fyrir neinu, hvorki eftir né núna. En nú hefst hin hræðilega bið! Verst við þetta allt saman er biðin eftir niðurstöðunum, og hugsa ég stanslaust um símtalið sem ég á eftir að fá. Svo er náttúrlega talað um 1% hættu á fósturláti eftir ástunguna. Mín einlæga spurning er þessi: Hversu lengi er maður talinn vera í hættu að missa fóstur eftir legvatnstungu? Eru það fyrstu dagarnir eftir stunguna sem eru taldir vera "critical" eða er það tíminn sem maður bíður niðurstaðna úr stungunni s.s 2-3 vikur? Er maður í aukinni hættu við að missa fóstur restina af meðgöngunni af því maður fór í legvatnssástungu? Mér þætti vænt um að fá svar við þessu sem fyrst, því ég er að verða frekar taugaveikluð með þetta allt saman. Finnst ég finna samdráttarverki, en samt ekki, það kom einn lítill blóðdropi í útferð hjá mér í dag og síðan ekki meir- en ofan á allt saman þá líður mér mjög vel og er farinn að finna hreyfingar hjá krílinu (þetta er mitt 3ja barn) eru það ekki örugglega 2-3 vikur sem tekur að fá niðurstöðurnar úr prófinu? Er nokkuð hægt að hringja á fósturgreiningadeildina og fá einhverjar fréttir af hvernig ræktunin miðar áfram?

Ein að farast úr áhyggjum.


Sæl!

Mesta hættan á fósturláti er fyrstu þrjá dagana  á eftir ástungunni, en hættan er ekki liðin hjá fyrr en eftir 2-3 vikur. Það tekur oftast 10-14 daga að fá niðurstöðu úr ástungunni og verður hringt í þig um leið svar liggur fyrir. Ef þú hefur áhyggjur af fóstrinu þá er einfaldast að tala við ljómóðurina þína og fá hana til að hlusta eftir fósturhljóðum.

Kveðja og gangi þér vel,

María Jóna Hreinsdóttir,
ljósmóðir - deildarstjóri fósturgreinardeildar LSH,
16. janúar 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.