Spurt og svarað

24. október 2012

Hörfræolía

Sælar
Hver er ykkar skoðun á því að gefa börnum, sex mánaða og eldri, hörfræolíu við hægðatregðu? Með kærri kveðju og þökkum fyrir afar gagnlegan vef.



Sæl
Það er oft talað um að setja hörfræolíu inn í mataræði hjá þeim börnum sem eru að byrja að borða t.d. hjá þeim sem fá grauta. Það er mjög einstaklingsbundið hvernig meltingarstarfsemin þolir breytinguna og auðvitað fer það aðeins eftir því hve breytingarnar eru hraðar. Sum börn fá hægðatregðu og því mikilvægara að bæta olíu inn í þeirra mataræði til þess að hægðalosun verði ekki óþægileg og þau verði hrædd við þá athöfn.
Hörfræolía er góð uppspretta fitusýra. Um það bil 70% eru fjölómettaðar fitusýrur, 18% einómettaðar fitusýrur og 9 % mettaðar fitusýrur. Um það bil 55% fitusýranna í hörfræolíu eru omega- 3 og alpha-linolenic acid (ALA). ALA eru mikilvægar byggingareiningar í frumuhimnum. Ég finn engar rannsóknir sem sýna fram á að hörfræolía sé skaðleg börnum og sýnt hefur verið fram á öryggi þar sem tekinn var skammtur sem innihélt 200 mg ALA í 3 mánuði. Samkvæmt þeirri rannsókn ættu 1-2 teskeiðar á dag að vera örugg fyrir þau börn sem fá hægðatregðu.
Öll þurfum við að fá fitu og auðvelt er að nálgast góðar vörur sem henta börnum, lýsið sem flest íslensk börn fá gefur okkur góðar fitusýrur sem skortir oft í löndum þar sem sólin er af skornum skammti og íslenska smjörið inniheldur góðar fitutegundir. Ekki má gleyma fitunni í brjóstamjólkinni sem þau börn sem ennþá eru á brjósti fá.

Vona að þetta svar hjálpi þér.
Margrét Unnur Sigtryggsdóttir,
Hjúkrunarfræðingur og ljósmóðir,
24. október 2012.




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.