Spurt og svarað

04. mars 2015

Magakveisa nýbura

Góðan dag. Sonur minn er 7 vikna og er með ungbarnakveisu. Ég er búin að fara með hann til barnalæknis til þess að útiloka að það sé eitthvað annað sem hrjáir hann. Mér finnst alveg ömurlegt að horfa upp á barnið mitt þegar hann grætur sárt og greinilega sárkvalin, kaldsvitnar og verður rauður í framan þegar hann fær magaverk. Ég var að leita á netinu að ráði við svona kveisu og þá fann ég gamalt húsráð að gefa barni púðursykursvatn? Haldið þið að það sé í lagi að prófa það? Öll ráð eru vel þegin frá ykkur en ég er búin að prófa minifoam og það virðist ekki hafa neitt að segja. Hann gleypir mikið loft þegar hann er að sýgur. Og læt ég hann alltaf ropa eftir gjöf, yfirleitt tekst það en stundum ekki. Ég nudda hann 1x á dag. Ætti ég að fara með hann aftur til barnalæknis ef hann verður ekkert skárri?


 Heil og sæl og þú átt alla mína samúð. Það er erfitt að vera með kveisubarn en sorglega lítið hægt að gera. Ég mundi ráða þér frá því að gefa púðursykurvatn, það er löngu búið að sýna fram á að gerir ekkert gagn. Oftast nær er kveisan gengin yfir um 12 vikna og oft fyrr. Þú verður því að horfa fram á veginn og vera þolinmóð. Oft hættir þetta eins skyndilega og það byrjaði. Mér sýnist þú gera allt það helsta sem mælt er með. Hvað varðar að fara með hann til barnalæknis held ég að það þýði ekki þar sem þú ert nú þegar búin að fara með hann. Það er lítið hægt að gera nema eins og þú gerðir að útiloka að það sé nokkuð annað sem hrjáir hann.
Gangi þér vel og ekki missa móðinn – þetta mun lagast!!!
 
Bestu kveðjur
Áslaug V.
ljósmóðir og hjúkrunarfræðingur
4. mars 2015




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.