Spurt og svarað

12. nóvember 2008

Sérstakar ungbarnadýnur?

Komið sælar og takk fyrir frábæran vef sem ég hef mikið getað leitað í á meðgöngunni.

Nú áskotnaðist okkur gömul vagga fyrir litla krílið fyrstu mánuðina en ætlum að setja nýja dýnu í hana. Nú kreppir svolítið að okkur (eins og öllum) og okkur býðst 5 cm þykkur svampur sem hægt er að skera út í vögguna og hyggst ég sauma utan um hann og svo setja lak þar yfir. Nú fæ ég bakþanka um að ég sé að gera rétt og sé að spara á röngum stað. Eru ungbarnadýnur eitthvað spes meðhöndlaðar? Gæti ég verið að gera barninu mínu illt með að nota þessa tilsniðnu heimatilbúnu svampdýnu?

Með bestu kveðju, Svampur Sveinsson.


Sæll og takk fyrir að leita til okkar.

Það er í góðu lagi að  nota 5 cm svampdýnu í vögguna fyrir litla krílið ykkar, þó ber að hafa í huga þegar velja skal dýnu í vöggu að:

  • Hún þarf að passa vel í og ekki á að vera hægt að setja fleiri en tvo fingur milli dýnunnar og hliða vöggunnar. Dýnan í vöggunni þarf að vera stöðug og traust. Tempur dýnur og vatnsdýnur eru alls ekki ætlaðar börnum.
  • Hlið ungbarnavöggunnar á að vera a.m.k. 27,5 cm.  Þegar mælt er frá efri brún dýnu skal hæðin upp að hliðarbrún vera a.m.k. 20 cm.
  • Notið ekki plast til að hlífa dýnunni heldur þar til gerð lök („pissulök“).

Ég vona að þetta svari spurningu þinni.  Gangi þér vel að útbúa dýnu fyrir litla krílið.

Kær kveðja,

Þórdís Björg Kristjánsdóttir,
ljósmóðir og hjúkrunarfræðingur,
12. nóvember 2008.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.