Spurt og svarað

09. nóvember 2009

Svefnvandamál tvíbura

Sælar ljósmæður!

Við erum með 14 vikna tvíbura, stúlku og dreng. Þau eru með mjög ólíkar svefnvenjur. Á kvöldin leggjum við hana í rúmið og hún sofnar og sefur í u.þ.b. 8 klst. (sem er eins og eftir pöntun!). Hann mótmælir alltaf þegar hann er lagður í rúmið og grætur. Og til að hann veki ekki tvíburasystur sína og aðra eldri systur í næsta herbergi þá tökum við hann fram og höfum hann hjá okkur (sem við vitum að er algjör vitleysa). Yfir nóttina vaknar hann á u.þ.b. tveggja tíma fresti. Hann er oft með stíflað nef og það vekur hann. Hann sefur alltaf vel í vagninum á daginn og bílstólnum. Til að taka á þessu þarf sennilega nokkur kvöld í „þjálfun“. Hvað mynduð þið ráðleggja okkur að gera við tvíburasysturina á meðan? Eigum við að hafa hana í öðru herbergi á meðan við venjum hann við að sofna og sofa eða eigum við að hafa hana í sama herbergi og láta hann trufla hana?

Kveðja, G.


Sæl - og til hamingju með tvíburana þína.

Það er alltaf erfitt að eiga við svefnvandamál ungbarna. Ég held að það væri best í ykkar stöðu að láta litlu systur hans í annað herbergi á meðan að þið venjið hann við að sofna og sofa í rúminu sínu. Hann er núna búinn að venjast því að vera í selskap þegar hann á að sofna - og það getur tekið á að snúa því við. En það er hægt að venja þau á að sofna sjálf í sínu rúmi og taka þetta skref fyrir skref. Það eru mjög góðar leiðbeiningar í bókinni: Draumaland - svefn og svefnvenjur barna frá fæðingu til tveggja ára. Þú getur kannski fengið hana lánaða í bókasafninu, þetta er nýleg bók og höfundur er hjúkrunarfræðingur sem sinnir líka svefnráðgjöf barna.

Gangi ykkur vel.

Kveðja,

Ingibjörg Eiríksdóttir,
ljósmóðir og brjóstagjafaráðgjafi,
9. nóvember 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.