Spurt og svarað

23. janúar 2013

Tengsl vöggudauða og nikótínuppgufunar af húð

Komið sæl.
Ég fékk þær leiðbeiningar að betra væri fyrir ungabarnið mitt að vera ekki í fangi fólks sem hefði reykt síðustu tvær klukkustundirnar vegna aukinnar hættu á vöggudauða. Það væri áframhaldandi uppgufun á nikótíni frá húðinni sem gæti haft áhrif á öndun barnsins, hægt á andadrættinum og valdið vöggudauða. Er eitthvað til í þessu? Og ef svo er, er þá nóg að setja hreinsispritt á handleggi, bringu og háls reykingamannsins áður en hann heldur á barninu?
Kv. Eva




Sæl Eva
Enn hefur ekki fundist nákvæmlega hver ástæða vöggudauða er, orsökin er margþætt en vitað er að reykingar móður sem og óbeinar reykingar auka áhættuna. Talað er um að reykingar í umhverfinu þar sem barnið býr í sé talinn áhættuþáttur þar sem efni í sígarettureyknum geti sest á húsgöng og verið virk í einhverjar vikur.
Á vef landlæknisembættisins er bæklingur um börn og óbeinar reykingar sem ég vísa í.
http://www.landlaeknir.is/servlet/file/store93/item11931/version7/Born_og_obeinar_reykingar.pdf
Hvergi sé ég talað um leifar á húð eða úr andadrætti en mér þykir það ekki ólíklegt. Best er trúlega að viðkomandi þvoi sér vel um hendur og andlit til að losna við efnin úr sígarettureyknum.
Enn og aftur segi ég þó að orsök vöggudauða er margþætt en samkvæmt ráðleggingum landlæknis má gera ýmislegt til að minnka líkurnar: sjá bækling um forvarnir gegn skyndidauða ungbarna.

Gangi ykkur vel


Kveðja,
Margrét Unnur Sigtryggsdóttir,
Hjúkrunarfræðingur og ljósmóðir,
23. janúar 2013




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.