Spurt og svarað

12. október 2009

Vatn í eyru ungbarns

Þegar verið er að baða ungbörn, verður þá að passa að ekki fari vatn í eyrun á þeim? Bæði foreldrar mínir og tengdó sögðu mér það. Þau geta hins vegar ekki gefið mér nákvæmar skýringar á því af hverju það er bannað. Þetta er eitthvað sem þeim var kennt þegar þau eignuðust sín börn.

Mér finnst þetta mjög skrýtið þar sem mörg börn fara í ungbarnasund mjög ung, svo finnst mér erfitt að koma í veg fyrir þetta við böðun.  Er einhver góð ástæða fyrir þessu eða er þetta bara rugl? Ef þetta er rétt, hversu lengi á maður þá að passa upp á þetta?  Á spítalanum var ekki minnst á þetta en sagt að ég ætti alltaf að þurrka eyrun með eyrnapinna eftir það. Ég gerði það fyrstu vikuna síðan gafst ég upp og þurrkaði bara með handklæði.

Eyrun voru hvort sem er orðin þurr þegar ég var búin að ná í eyrnapinna. Á maður kannski að þurrka alveg inn í eyrnagöngin með pinnanum? Takk fyrir frábæran vef

Bestu kveðjur

Líney


Komdu sæl Líney

Þetta er eitthvað gamalt að ekki megi fara vatn í eyrun á ungbörnum.  Þau liggja jú í legvatni fyrstu 9 mánuðina sína.  Ekki hefur verið sýnt fram á með óyggjandi hætti að vatn í eyru stuðli að eyrnabólgum.

Þú átt að þurrka með handklæði eyrum á barninu og aldrei ætti að fara með bómullarpinna inn í eyrnagöngin á barni.  Þeir geta verið ágætir til að þrífa ytra eyrað ef þarf.

Kveðja

Rannveig B. Ragnarsdóttir,
ljósmóðir og hjúkrunarfræðingur.
12. október 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.