Spurt og svarað

11. mars 2005

Fósturlát

Ég vil þakka þér kærlega fyrir greinagóð svör. Þetta er mjög þarft og nauðsynlegt fyrir órólegar verðandi mæður. Ég er búin að senda nokkrar fyrirspurnir og alltaf fengið greinargóð svör. Þannig er mál með vexti að ég missti fóstrið í gær. Fékk rosalega mikla verki og blæðingu fór upp á spítala og þá var allt farið. En spurningin er sú er ég er búin að vera með hræðilega túrverki í allan dag hef aldrei fengið svona rosalega verki, hvenær hættir þetta? Tel ég þetta sem blæðingar eða koma þær seinna? Læknirinn sagði að það væri talað um 3 mánuði sem væri æskilegt að bíða en sagði að það ætti að vera í lagi þegar eðlilegar tíðir væru komnar á rétt ról. Sá svo á doktor.is að það væri mælt með 3 mánuðum. Hvort telur þú að sé heppilegra?

Með fyrirfram þökk.

...........................................................................

Sæl vertu og þakka þér fyrirspurnina og hrósið.

Leitt að heyra um fósturlátið þitt.  Ég vona að verkirnir séu batnandi en það er svolítið misjafnt milli kvenna hversu lengi þeir vara en þeir ættu alltaf að vera í betri átt, ef þeir versna eða blæðingarnar aukast er ástæða til að leita læknisaðstoðar.  Það er líka misjafnt hversu fljótt konur hafa egglos aftur og blæðingar eftir það þannig að ekki er hægt að telja fósturlátið eins og blæðingar, þú verður að bíða eftir næstu blæðingum og byrja þá að telja.  Ástæðan fyrir því að læknarnir mæla með 3 mánuðum er að þá er legið að öllum líkindum búið að jafna sig vel og minni líkur eru á öðru fósturláti.  Mér er þó kunnugt um konur sem hafa orðið ófrískar án þess að hafa nokkru sinni fengið blæðingar eftir fósturlát og meðgöngurnar hafa gengið að óskum.  Ég hallast frekar að því að þú reynir að bíða svolítinn tíma með að reyna aftur, fósturlát er ekki aðeins eitthvað sem kroppurinn gengur í gegnum og þarf að taka tillit til, hjá flestum konum vekur fósturlát upp urmul af erfiðum tilfinningum sem maður þarf oft tíma til að átta sig á og glíma við.

Með von um að næst gangi betur.

Bestu kveðjur,

Inga Vala Jónsdóttir,
ljósmóðir og hjúkrunarfræðingur,
11. mars, 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.