Spurt og svarað

29. janúar 2007

Að reyna

Sælar,  ég talaði hjá lækni um daginn þar sem við höfum reynt að eignast barn í um ár. Ég er orðin 36 ára og á fyrir börn sem komu öll fyrir þrítugt. Min reynsla er að ég varð ófrísk strax í fyrsta mánuði, reyndar er ég nú gift aftur og maðurinn minn er ekki barnsfaðir barnanna.

Ég ræddi við læknirinn minn um að ég fái mikla verki á meðan egglos á sér stað. Verkirnir standa yfir í nokkra daga (nokkrir verkir á dag í ca 2-5 daga) en þegar kemur að blæðingum sem eru reglulegar fæ ég enga túrverki. Læknirinn vildi meina að líklega fái ég ekkert egglos. Er það möguleiki? Hvað annað gæti verið að? Ég er með frekar miklar blæðingar. Var fyrir einu og hálfu ári á hormónalykkjunni í 4,5 ár.  Hafði þá engar blæðingar á þeim tíma. Hefur eitthvað ruglast eftir þessa getnaðarvörn?

Vonast eftir svari fljótlega.

Með fyrirfram þökk og kveðjur
Guðrún

Komdu sæl Guðrún

Því miður get ég ekki sagt þér hvað er að, það krefst rannsókna og ýtarlegri upplýsinga. Það er alveg möguleiki að þú fáir ekki egglos, þrátt fyrir mikla verki en það er ekkert víst, það er eitthvað sem þyrfti að skoða nánar. Konur verða minna frjóar með árunum þannig að þó þér hafi gengið vel að verða ólétt fyrir þrítugt á það ekki endilega við núna. Svo getur eitthvað verið að hjá manninum þínum sem þarf kannski að athuga. 

Það getur tekið líkamann svolítinn tíma að jafna sig eftir notkun hormónagetnaðarvarna þannig að það er ekki hægt að útiloka strax að lykkjan hafi þessi áhrif. Andleg líðan spilar líka inní.

Ég ráðlegg þér að tala um þetta við kvensjúkdómalækni, kannski vill hann senda þig/ykkur í rannsóknir til að fá úr því skorið hvort eitthvað sé að.

Gangi ykkur vel.

Rannveig B. Ragnarsdóttir, hjúkrunarfræðingur og ljósmóðir.
Yfirfarið í janúar 2020

 

Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.