Spurt og svarað

07. mars 2007

Hve lengi varir egglos?

Sælar!

Ég hef notað egglosmæli til að vita hvenær egglos er. Ég mæli mig á hverjum morgni á líklegu tímabili og þegar prófið er jákvætt reyni ég að verða þunguð. Ég hef heyrt að sæði geti lifað í 48 klukkustundir innan líkama konunnar en hvergi fengið upplýsingar um hversu langur tíminn er frá því að egg fer af stað og þar til sæði hefur misst af því. Þarf sæðið að vera komið á staðinn fyrir egglosið eða er nóg að reyna um morguninn sem egglosmælirinn sýnir jákvætt próf? Hvað með að kvöldi þess dags, er það of seint?

Með von um svör.

Fyrirfram þakkir og bestu kveðjur.

Sæl og blessuð!

Sæði getur lifað í allt að 5 daga við kjöraðstæður í legi konunnar, en best er að gera ráð fyrir að það lifi í sirka 2 daga. Eggið getur hins vegar aðeins lifað í 12-24 tíma eftir að það losnar úr eggjastokknum. Til þess að þungun geti orðið þarf því sæði að komast inn í leggöng á tímabilinu frá 2 dögum fyrir egglos og þangað til í síðasta lagi sólarhring eftir egglos.

Egglosprófin mæla styrk hormónsins LH í þvagi, þannig að þegar egglosprófið er jákvætt er hormónið LH í toppi. Egglos verður 24-36 klst eftir LH topp þannig að þú færð egglos ekki fyrr en 24-36 tímum eftir jákvætt egglospróf. Því er kjörið að reyna daginn sem þú færð jákvætt egglospróf, jafnvel daginn áður og jafnvel daginn eftir (eftir því hvenær dags þú tekur prófið).

Gangi ykkur vel.

Kær kveðja, Hafdís Guðnadóttir, hjúkrunarfræðingur og ljósmóðir.
Janúar 2020





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.