Keiluskurður fyrir meðgöngu

07.06.2007

Sælar veri þið og takk fyrir frábæran vef,

Mig langar til að spyrja ykkur útí keiluskurð eins og hefur komið áður hérna fram, ég sé að ekki er mælt með því að konur verði þungaðar fyrr en 3 mánuðum eftir keiluskurð, hvað getur hugsanlega gerst ef kona verður ólétt innan þessa tíma? mánuði eftir eða 2 mánuðum eftir. Er það hættulegt fyrir konuna eða verður meðgangan erfiðari eða meiri líkur á fósturmissi?



Komdu sæl

Venjulega er talað um 3 mánuði til að gefa líkamanum tækifæri til að jafna sig eftir keiluskurðinn, gróa vel og slíkt.  Allar aðgerðir eru álag fyrir líkamann og gott að gefa honum tíma til að jafna sig áður en farið er út í meðgöngu sem hefur jú gríðarmiklar breytingar á líkamanum í för með sér.  Það er mjög misjafnt hversu mikið er tekið af leghálsinum í þessum aðgerðum og þar af leiðandi hvenær konan er tilbúin til að verða ólétt, en þetta er svona viðmiðunartala fyrir allar.  Oftast gerist nú samt ekkert hættulegt þó konan verði ólétt fyrir þennan tíma.  Það getur verið gott fyrir þig að ræða þetta við lækninn þinn sem veit meira um þitt persónulega mál og getur ráðlagt þér útfrá því.

Gangi þér vel

Rannveig B. Ragnarsdóttir,
ljósmóðir og hjúkrunarfræðingur.
7. júní 2007.