Langar að verða ólétt en er of þung

06.08.2008

Sæl!

Mig langar að verða ólétt fljótlega en er allt of þung. Mig langar að vita hvernig er best að léttast um u.þ.b. 7- 15 kg á 1-2 mánuðum. Ég komin í 30 BMI og vildi komast í  25-27 BMI. Er í lagi að léttast á meðgöngu, er þá að meina að vera í sömu þyngd?


Sæl og blessuð!

Það er snjallt hjá þér að taka á málunum fyrir þungun og reyna svo að þyngjast ekki of mikið á meðgöngunni. Það er nú sennilega helst til of mikið að léttast um 15 kg. á 2 mánuðum en þú ættir að geta misst um 6-8 kg. á 2 mánuðum. Það er auðvitað margar leiðir til að grennast. Mörgum hefur gengið vel hjá dönsku vigtarráðgjöfunum og svo eru ýmis konar námskeið á líkamsræktarstöðunum svo og einkaþjálfarar sem hjálpa fólki að léttast. Þú verður að velja þá leið sem hentar þér best. Það virðist reynast fólki vel að hafa einhvers konar aðhald eins og að mæta á vigt reglulega og fá stuðning frá fagaðilum og öðrum sem eru í sömu sporum.

Þú getur lesið um þyngdaraukningu á meðgöngu og fyrirspurn um danska mataræðið hér á síðunni okkar.

Gangi þér vel.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
6. ágúst 2008.