Utanlegsfóstur síðast liðið sumar

21.09.2004

Sælar

Það var utanlegsfóstur fjarlægt hjá mér í sumar þar sem eggjaleiðarinn var ekki fjarlægður eru þá líkurnar miklar að ég þurfi að ganga í gegnum þetta aftur næst þegar ég verð ólétt?  Einnig, ef ég verð aftur ólétt, hvenær ætti ég að fara í skoðun?  Ætti ég að fara upp á Landspítala eða kvensjúkdómalæknis?  Væri ekki möguleiki að fara upp á Landspítala þegar ég hef fengið jákvætt á þungunarprófi og láta taka blóð til að sjá hvort hækkunin á hormónunum sé rétt?

Fyrirfram þakkir.

............................................................

Sæl vertu og takk fyrir fyrirspurnina.

Það er oftast mjög erfið reynsla að fá utanlegsfóstur og ég skil vel að þú sért að velta fyrir þér möguleikunum á að þetta geti komið fyrir aftur. Líkurnar eru svolítið meiri hjá þér en hjá konu sem aldrei hefur fengið utanlegsfóstur, heimild sem ég hef undir höndum nefnir 12% líkur miðað við 1% líkur hjá konu sem aldrei hefur fengið utanlegsfóstur.  Þetta hljómar kannski mikið en hafðu í huga hversu miklu meiri líkur eru á því að það gerist ekki.  Mér er ekki kunnugt hvernig þjónustu Landspítalans er háttað í þessum efnum en ég veit að vaninn er sá að læknar gera beiðnir um rannsóknir og lesa úr þeim svo ég tel best að einhver einn læknir sé inni í þínum málum. Ég held að best væri að þú hefðir samband við kvensjúkdómalækninn þinn núna áður en þú verður ólétt og leggja með honum áætlun til að fara eftir þegar það gerist, t.d. hvenær er kominn tími til að fara í blóðprufu til að athuga hvort meðgönguhormónin aukast eðlilega, hvenær er hægt að skoða með ómskoðun hvort þungunin er innan eða utan legs o.s.frv.

Með von um að allt gangi vel næst.

Bestu kveðjur,

Inga Vala Jónsdóttir,
ljósmóðir og hjúkrunarfræðingur,
18. september, 2004.