Spurt og svarað

12. maí 2005

Þungun eftir fósturmissi

Mig langar að fá upplýsingar um það hvort mælt sé með því sérstaklega að beðið sé eftir að verða þunguð aftur, eftir að fósturlát var sett af stað með fæðingu á 15. viku meðgöngu? Ef mælt er með að bíða, hversu lengi þá og hver er ástæðan fyrir biðinni? Einnig langar mig til þess að vita hvenær ég get átt von á fyrstu blæðingum á eftir.

.....................................................................

Sæl vertu og þakka þér fyrirspurnina!

Leitt að heyra um fósturmissinn þinn, ég vona að þú náir að jafna þig fljótt, andlega sem líkamlega. Heimildir sem ég hef undir höndum mæla frekar með að beðið sé í a.m.k. þrjá mánuði með að reyna þungun aftur þó sumar telji nægilegt að bíða eftir fyrstu blæðingunum, sérstaklega þegar fósturlátið er snemma á meðgöngunni. Legið byrjar fljótt að stækka við þungunina, fyrir meðgöngu er það 80-120g en fer upp í u.þ.b. 1000g í fullri meðgöngu, það tekur legið tima að komast í upprunalegt horf og talið er að það minnki líkur á öðru fósturláti að bíða.  Það er svolítið misjafnt hvenær fyrstu blæðingarnar koma en oftast gerist það 4-6 vikum eftir fósturlátið, það getur þó tekið lengri tíma eftir því sem lengra var komið í meðgöngu þegar fósturlátið varð.  Ef blæðingarnar eru ekki farnar að láta á sér kræla innan þriggja mánaða er ástæða til að láta athuga málið og auðvitað fyrr ef þú hefur áhyggjur af þessu. Með von um gott gengi.

Bestu kveðjur,

Inga Vala Jónsdóttir,
ljósmóðir og hjúkrunarfræðingur,
12. maí 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.