Bil á milli kviðvöðva

20.08.2013
Sælar og takk fyrir gagnlegan vef.
Er eðlilegt að hafa tvö þumlungsbil á milli kviðvöðvanna sitt hvoru megin við naflann. Ég eignaðist barn númer tvö fyrir tveimur árum og hef stundað hreyfingu að einhverju leiti á þessum tíma en alls engar öfgar og fór ekki snemma af stað að æfa aftur eftir fæðingu.
Nú hinsvegar hef ég verið að gera magaæfingar og mér finnst vöðvarnir færast lengra frá hvor öðrum heldur en nær. Er þetta alveg eðlilegt og er allt í lagi fyrir mig að gera magaæfingar? Á meðgöngunni fékk ég mjög líklega kviðslit að innan í kringum naflann og það er einmitt þar sem að mesta bilið er. Með von um skjót svör
Kveðja Sandra



Sæl og takk fyrir fyrirspurnina. Hjá flestum konum gengur bilið sem myndast á milli rectus abdominis vöðvanna til baka nokkrum mánuðum eftir fæðingu og talið ráðlagt að bíða með magaæfingar í ca 6 vikur til að minnka líkurnar á því að þeir styttist áður en bilið minnkar. Þegar bilið er meira en 2 fingurbreiddir og gengur ekki eða lítillega til baka er talað um diastatis recti.



Í einhverri bók sá ég að konum sem voru með aukið bil milli Rectus vöðvanna var ráðlagt að setja handklæði undir sig og halda í enda þess í kross yfir kviðnum þegar þær voru að gera uppsetur til þess að ná vöðvunum í miðlínu. Hér má sjá nánari upplýsingar um æfingar með handklæði og önnur úrræði. http://www.pregnancyandbaby.com/moms/articles/945593/diastasis-recti-abdominal-separation-help-exercises-for-a-flat-tummy



Einnig hef ég heyrt talað um að plankaæfingar henti ekki ef aukið bil er milli magavöðvanna. Á Youtube fann ég myndband með æfingum til að styrkja magavöðva eftir fæðingu http://www.youtube.com/watch?v=6mpd3EVRaO4

Þú verður að fara varlega af stað vegna kviðslitsins en vonandi hjálpar þetta þér og ekki gleyma bakæfingunum


Margrét Unnur Sigtryggsdóttir,
Hjúkrunarfræðingur og ljósmóðir,
20. ágúst 2013