Spurt og svarað

24. mars 2014

Eftirskoðun og krabbameinsskoðun

Ég er farin að huga að að fara í eftirskoðun eftir fæðingu. Stelpan er 5 vikna og ég veit að maður þarf að bíða í 6 vikur áður en maður fer í skoðun. Ég þarf svosem ekkert að fara því ég var ekkert saumuð en ætla að fara fá mér lykkjuna því frekari barneignir eru ekki á dagskrá. Ég ætlaði að nýta ferðina og fara í krabbameinsskoðun þar sem það er komin tími á mig og ekkert endilega það skemmtilegasta að þurfa að fara oftar en maður þarf í kjallaraskoðun en þá fékk ég að heyra að maður þurfi að bíða í minnsta kosti 2 mánuði áður en krabbameinsstrok væri tekið eftir fæðingu því annars gæti niðurstaðan verið röng? Er ekki rétt í því? Minnir að ég hafi farið þegar eldri stelpan var 9 vikna og farið í krabbameinsskoðun í leiðinni en ég bara er hreinlega búin að gleyma því! Ég get svosem alveg beðið í tvo mánuði til að þurfa ekki að koma aftur og nota smokkinn í staðinn!



Komdu sæl.
Ég hafði samband við tvo fæðinga- og kvensjúkdómalækna til að athuga hvenær þeir mæla með að fara í krabbameinsstrok eftir fæðingu. Þeir sögðu báðir að æskilegast væri að bíða í 3 mánuði eftir fæðingu til þess að niðurstaðan yrði sem marktækust. Lykkjuna er hægt að setja upp 6 vikum eftir fæðingu ef allt er eðlilegt. Ég myndi því mæla með því að fara 3 mánuðum eftir fæðingu og þá getur þú bæði látið taka strok og setja lykkjuna upp.


Með kveðju,
Súsanna Kristín Knútsdóttir,
ljósmóðir og hjúkrunarfræðingur,
24. mars 2014.




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.