Spurt og svarað

10. ágúst 2009

Fæðingarþunglyndi eftir lok brjóstagjafar

Sælar dömur.

Þannig er mál með vexti að konan mín getur ekki haft litla kallinn okkar á brjósti, það var allt reynt en ekkert gekk, hann er orðinn 6 mánaða en hún gafst upp þegar hann var rúmlega 4-ra. Hún meira að segja þrjóskaðist við að mjólka nokkra dropa handa honum í lokin.  Þetta var henni mikið áfall og núna getur hún ekki hætt að tala um þetta, að hún sé misheppnuð móðir, hann sé ekki nógu vel varinn núna og þetta sé eitthvað sem hafi verið tekið frá henni og hún fái aldrei til baka. Hún meira að segja grætur enn yfir þessu.  Vil taka það fram að hún er alveg hreint dásamleg móðir. Núna spyr ég gæti hún hreinlega verið orðin þunglynd vegna þessa?  Er þetta eitthvað sem er algengt?  Hvað get ég gert til að hjálpa henni og jafnvel hvort það er einhver sem hún getur talað við?  Eru einhverjir hópar þar sem konur með svipuð vandamál hittast og ræða sína reynslu, eitthvað sem ég get bent henni á?


Komdu sæll.

Að mínu mati hefur konan þín staðið sig mjög vel að vera með hann í 4 mánuði á brjósti.  Viðbrögðin sem þú lýsir gætu bent til fæðingarþunglyndis og því gæti verið gott fyrir ykkur að hitta hjúkrunarfræðinginn sem er með drenginn í ungbarnavernd og ræða þetta við hana. Gæti verið gott ef þú færir með henni og segðir frá.  Þið þurfið jafnvel að tala við heimilislækni líka sem getur svo vísað ykkur áfram til sálfræðings ef þurfa þykir.

Ég veit ekki um neina sérstaka hópa sem hafa myndast í kringum svona aðstæður en það getur verið gagnlegt að fara á mömmumorgna í kirkjunni og ræða málin við aðrar konur sem hafa mismunandi sögur að segja.

Kveðja

Rannveig B. Ragnarsdóttir,
ljósmóðir og hjúkrunarfræðingur.
10. ágúst 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.