Gyllinæð eftir fæðingu

20.04.2005

Ég er nýbúin að eiga litla dömu og er það mitt annað barn en ég lenti í því núna á seinni meðgöngunni að ég fékk væga gyllinæð sem fór fljótlega eftir að ég átti. En nú er bara vandamálið það að það fór ekki allt, þ.e.a.s. eftir hangir skinnpoki eða ég veit ekki hvað á að kalla þetta, út úr endaþarminum og þetta veldur mér miklum óþægindum, ekki líkamlegum heldur andlegum. Hvert á maður að snúa sér út af svona löguðu eða get ég gert eitthvað svo þetta hverfi að sjálfu sér?  Ég er svo feimin yfir þessu að ég treysti mér valla til að fara til kvensjúkdómalæknis í eftir skoðun.

...................................................................

Sæl og takk fyrir fyrirspurnina.

Ég skil að þú sért feimin yfir þessu en trúðu mér kvensjúkdómalæknar eru mjög vanir að sjá gyllinæð eftir fæðingu.  Þú getur keypt þér krem og stíla í apóteki sem heita proctocedyl (án lyfseðils) eða Doloproct (lyfseðilskylt).  Þeir hjálpa yfirleitt til við óþægindin (ef þau eru líkamleg) en ekki þessi andlegu.  Þú getur haft samband við sérfræðing í þessu fagi, t.d. Tómas Jónsson á skurðdeild 12 G á Landspítala Háskólasjúkrahúsi. 
En það er auðvelt fyrir mig að segja þér að hafa ekki áhyggjur af þessu en ekki kannski eins auðvelt fyrir þig að ýta þessu frá þér.  Ég vil samt ítreka það að gyllinæð er mjög algeng eftir fæðingu og það gæti einnig verið gott að láta kvensjúkdómalækninn þinn beina þér í réttan farveg ef gera þarf einhver inngrip. 

Einnig gætirðu prófað nálastungur og séð hvort þær hjálpi þér.
Vonandi svarar þetta spurningu þinni,

kær kveðja,

Guðrún Sigríður Ólafsdóttir,
ljósmóðir og hjúkrunarfræðingur,
20. apríl 2005.