Spurt og svarað

16. desember 2006

Kynlíf stuttu eftir fæðingu

Sælar og takk fyrir gagnlegan vef

Ég eignaðist barn fyrir 17 dögum og fannst ég vera tilbúin að fara að stunda kynlíf aftur því sársaukinn var farinn og útferðin nánast engin.  Við notuðum smokk til að koma í veg fyrir sýkingu. En svo var þetta óþægilegt, ekki mjög sárt, en samt soldið vont og núna svíður mig í píkuna. Það kom líka smá blóðlitaður vökvi úr leggöngunum þegar ég fór á klósettið. Ég er dauðhrædd um að ég hafi valdið einhverjum skaða. Ég var saumuð. Ég fékk fyrsta stigs rifu en það voru mörg spor. Getur verið að ég hafi skaðað mig eitthvað? og er í öllum tilvikum of snemmt að byrja kynlíf tæpum þremur vikum eftir fæðingu?

Komdu sæl og til hamingju með barnið.
 
Nei þú ert ekkert að byrja kynlíf of snemma það verður hver og ein að ákveða fyrir sjálfa sig hvenær hún er tilbúin.  Það er næstum ómögulegt að þú hafir skaðað þig eitthvað með þessu, sennilega hefur bara blætt aðeins frá leghálsinum því hann er enn viðkvæmur eftir fæðinguna.  Leggöngin eru líka oft þurr eftir fæðingu og sérstaklega þegar konan er með barn á brjósti og það getur hafa valdið óþægindunum og sviðanum.   Fyrsta stigs rifa er mjög lítil og slímhúðin grær á u.þ.b. viku.  Það getur hinsvegar tekið saumana um 6 vikur að leysast alveg upp og hverfa þannig að hugsanlega hefur eitthvað tog komið á sauma sem eru undir húðinni.  Þetta er hættulaust og ekkert til að hafa áhyggjur af.
 
Bestu kveðjur
 
Rannveig B. Ragnarsdóttir,
hjúkrunarfræðingur og ljósmóðir. 
15.12.2006.




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.