Líkamsrækt eftir fæðingu

06.07.2004

Hvenær er óhætt að byrja að stunda líkamsrækt eftir fæðingu og hvaða æfingar er best að stunda og eins að forðast?

...................................................................

Komdu sæl og takk fyrir fyrirspurnina.
 
Líkamsrækt eða líkamsþjálfun eftir eðlilega fæðingu og eðlilega meðgöngu er af hinu góða og flýtir fyrir því að konan nái upp eðlilegu líkamsástandi. Líkamsrækt styrkir stoðkerfið og getur fyrirbyggt vandamál eins og bakvandamál í tengslum við brjóstagjöf (efri bakvöðvar á milli herðablaða) eða þvagleka vegna slappra grindarbotnsvöðva. Það er líka talið gott fyrir sálartetrið og andlega líðan að hreyfa sig og skipta um umhverfi með því að fara út af heimilinu. Konur finna það best sjálfar, hvenær þær eru tilbúnar að byrja líkamsrækt eftir fæðingu. Það er einstaklingsbundið og skiptir þar máli í hvers konar formi konan er við fæðingu, hvort hún hefur stundað líkamsrækt á meðgöngu og/eða fyrir hana.   Almenna reglan er hins vegar sú, að óhætt sé að byrja á léttri líkamsrækt sex vikum eftir fæðingu og erfiðari líkamsrækt þremur mánuðum eftir fæðingu. Þó ættu allar konur að gera grindarbotnsæfingar strax eftir fæðingu til að styrkja grindarbotninn og koma þannig í veg fyrir vandamál honum tengdum. Öllum konum ætti að vera hollt að fara út að ganga fljótlega eftir fæðingu, bara stutt í einu og oftar. Sund er einnig gott eftir að hreinsun lýkur en passa verður vel upp á brjóstin hjá mjólkandi konum vegna kulda, sem getur orsakað mjólkurstíflur.

Þær æfingar, sem mælt er með að gera eftir fæðingu eru alhliða styrktaræfingar fyrir grindarbotn, kvið, bak og brjóstvöðva auk teygjuæfinga fyrir bak (efra og neðra), brjóstvöðva og háls. Þegar verið er að gera bakæfingar er gott að hafa kodda eða púða undir maganum til að hlífa viðkvæmum brjóstum. Ganga eða að hjóla á þrekhjóli styrkir svo neðri útlimina og ekki má gleyma að teygja á kálfum og lærum á eftir. Það sama á við um allar líkamsæfingar, að hlusta beri á líkamann á meðan og ekki skuli fara fram yfir sársaukamörk við æfingarnar til að ofbjóða honum ekki og e.t.v. skapa einhver vandamál.

Þær æfingar, sem ætti að forðast, dettur mér helst í hug hopp og hlaup á meðan grindarbotninn hefur ekki náð fullum styrk eftir fæðinguna.
 
Með ósk um gott gengi og heilbrigða sál í hraustum líkama.

Kolbrún Jónsdóttir, hjúkrunarfræðingur og ljósmóðir - 6. júlí 2004.