Spurt og svarað

02. febrúar 2005

Saumuð of mikið saman

Sælar og takk fyrir frábæran vef!

Ég eignaðist barn í byrjun desember og ég var saumuð of mikið saman eftir barnsburðinn. Læknirinn sem skoðaði mig sagði að annað hvort þyrfti ég að fara í aðgerð eða ég gæti smám saman rakið upp sauminn sjálf (þ.e. teygt leggangaopið smám saman þar til saumurinn rofnar). Ég er nú ekkert ægilega spennt fyrir seinni kostinum og ég var að velta fyrir mér hvort kostnaðurinn við aðgerð myndi lenda á mínum herðum? Telst þetta ekki sem mistök af hálfu þess sem saumaði mig? Og að lokum hvert get ég snúið mér til að fá upplýsingar um þetta?

Kær kveðja og takk fyrir aðstoðina.

....................................................................

Sæl og takk fyrir að leita til okkar.

Ég vil benda þér á að hafa samband við þá stofnun sem þú fæddir á og jafnvel að panta tíma hjá kvensjúkdómalækni sem starfar á þeirri stofnun. Kannski er heppilegast að panta tíma hjá þeim lækni sem er yfir kvensjúkdómalækningum á stofnuninni.  Ef það er þörf á aðgerð ætti að vera hægt að leysa það innan stofnunarinnar sem ber þá væntanlega kostnaðinn.

Vona að þessar upplýsingar komi að gagni.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
2. febrúar 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.