Spurt og svarað

24. nóvember 2007

Úthreinsun

Ég átti barn fyrir 6 vikum og vildi spyrja hvort það væri eðlilegt að það væri ennþá fersk blæðing. Það kemur ekki mikið en blæðingin er samt sem áður fersk.

Kveðja



Komdu sæl og takk fyrir að leita á ljósmóðir.is

Í nokkrar vikur eftir fæðinguna, yfirleitt 4-6 vikur, er legið að hreinsa sig af blóði, slími og vefjarestum, en það er líka sár í leginu eftir fylgjuna sem tekur tíma að gróa. Þessi úthreinsun kallast á erlendum málum lochia. Fyrstu dagana eftir fæðinguna er úthreinsunin rauðleit og líkist á margan hátt fremur miklum tíðarblæðingum. Í lok fyrstu viku eftir fæðingu breytist þessi útferð yfirleitt, verður minni og liturinn verður rauðbrúnn. Á næstu vikum breytist útferðin frá því að vera bleik yfir í það verða gulhvítleit og konan byrjar að skipta sjaldnar um bindi. Allar athafnir sem auka tæmingu legsins, eins og það að standa, hreyfa sig eða gefa brjóst geta aukið á magn útferðarinnar.

Þú talar um að úthreinsun hjá þér núna eftir 6 vikur sé enn þá mjög rauðleit, en að sama skapi sé hún ekki mikil. Ef þér líður vel, og ef þú ert ekki með hita eða einkenni um sýkingu, eins og illa lyktandi útferð, held ég að þetta sé alveg eðlilegt. Stundum tekur lengri tíma fyrir legið að jafna sig og gróa. Þá er líka stundum að konur byrji á “míni-blæðingum” eftir ca. 6vikur, sérstaklega ef þær hafa barnið ekki eingöngu á brjósti, en í þeim tilfellum þá lýsa konur því þannig að það sé eins og úthreinsun hafi hætt en byrji svo skyndilega aftur ca. 6 vikum eftir fæðinguna og sé þá eins og 1/3 af venjulegum blæðingum. Ef þér finnst þessi blæðing sem þú lýsir sé hins vegar að breytast og verða meiri ættir þú ekki að hika við að hafa samband við kvensjúkdómalækni og fara í eftirskoðun.

Vona að þér gangi vel,

bestu kveðjur,

Steinunn H.Blöndal
ljósmóðir og hjúkrunarfræðingur
24.11.2007






Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.