Spurt og svarað

02. apríl 2008

Er í lagi fá sér kött á meðgöngu?

Sælar og takk fyrir góðan vef.

Þannig er mál með vexti að gamli kisinn minn var að deyja og ég vil gjarnan fá mér annan kött á næstunni. Ég hef alltaf verið innan um ketti og fleiri dýr í sveitinni þó ég búi nú í borginni.  Ég þekki vel til áhættunnar um bogfrymlasótt, hef lesið hin svörin hér á vefnum og einnig það sem stendur á heimasíðu dýralæknisins Helgu Finnsdóttur.  Enda gætt því að fylgja öllum þeim ábendingum sem þar eru varðandi umgengni ófrískra kvenna við ketti. Nú var aftur á móti vinnufélagi minn að tala um að þótt ég hefði átt kött fram að þessu þá væri varhugavert að ég fengi mér nýjan. Mig langar að vita hvað gæti verið því til fyrirstöðu að ég fengi mér nýjan kött (er komin 28 vikur) því ég hef hvergi séð neitt um það þótt víða hafi ég leitað á netinu. Vonandi getið þið upplýst mig frekar.

Kær kveðja, Þórunn.


Sæl Þórunn!

Eins og svo oft áður þá leituðum við til Helgu Finnsdóttur, dýralæknis sem sendi okkur svar um hæl:

„Ég sé því einfaldlega ekkert til fyrirstöðu að hún fái sér kisu á ný; reyndar er meiri hætta á að ungir kettir séu frekar smitberar en þeir sem eldri eru, vel að merkja hafi þeir tækifæri til að veiða! Sé kisa ung og höfð alfarið inni, er sáralítil hætta á að hún sé smitberi. Þó kisa fari út en hafi sandkassa inni, en smithætta sáralítil sé skipt um sand reglulega og oft - og engin hætta fyrir ófríska konu að gera það hafi hún hanska. Auðvitað á alltaf að viðhafa fyllsta hreinlæti - en þar  sem talið er að aðalsmithættan sé við neyslu á hráu eða og lítið steiktu kjöti þarf að gæta þess neyta þess ekki (þ.e. lamba- eða svínakjöts)  og þvo allt grænmeti vel og vandlega (líka það sem er í pokum). Hafa hanska við vorstörfin í garðinum - og til að vera alveg viss, er auðvitað skynsamlegt í næstu læknisskoðun að láta mæla mótefni í blóði. Sé Þórunn neikvæð er hún í áhættuflokki sem þýðir að hún hefur ekki smitast af bogfrymlasótt og hefur engin mótefni. Þá þarf að taka fullt tillit til ofangreindra varúðaráðstafana. Sé hún hins vegar jákvæð er hún ekki í áhættuflokki.“

Vona að þetta komi að gagni.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
2. apríl 2008.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.