Doxýcýklín

12.03.2011

Góðan daginn!

Mig langar að vita hvort að ég megi taka Doxýcýklín. Ég er ekki barnshafandi en er að reyna að verða það. Ég veit að þunguðum konum er ekki gefið þetta lyf og var að velta fyrir mér hvort að það væri skaðlegt ef inntöku yrði hætt ef þungunarpróf yrði einhvern tíma jákvætt.

Kveðja, L.


Sæl og blessuð!

Samkvæmt upplýsingum á vef Lyfjastofnunar ættu þungaðar konur ekki nota þetta lyf. Það hefur verið sýnt fram á lyfið getur valdið óafturkræfum skemmdum á tönnum og getur sest í beinvef fósturs. Þunguðum konum er sérlega hætt við lifrarskemmdum af völdum lyfsins í stórum skömmtum. Sumar rannsóknir á þunguðum konum sem höfðu notað tetracyclin á fyrsta þriðjungi meðgöngu sýndu hugsanlega fjölgun minni háttar vanskapana en í öðrum rannsóknum hefur ekki komið fram fjölgun vanskapana.

Þannig að þú sérð að þetta fer ekki vel saman. Ég held að það væri vissara að fresta barneignartilraunum þar til þessari lyfjameðferð er lokið eða að bíða með lyfjameðferðina þar til síðar. Nú þarf að vega og meta kostina við þetta og sennilega er best fyrir þig að ráðfæra þig við lækninn sem ávísaði þessu lyfi. Kannski er hægt að nota annað lyf sem óhætt er að nota á meðgöngu.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
12. mars 2011.