Spurt og svarað

28. nóvember 2006

Göngutúr með ungbarn í frosti

Sælar,

Takk fyrir góðan vef, hann er búin að reynast mér rosalega vel.

Nú hefur frostið verið mikið undanfarið og ég er alltaf svo óviss hvort ég eigi að fara út að labba með stelpuna mína sem er nýorðin 3ja mánaða.  En ég hef farið frekar út að labba með hana daglega í stað þess að láta hana sofa úti á svölunum. Hvaða mörk ætti ég að hafa, ég hef hingað til miðað við að fara ekki út með hana ef frostið er -5 gráður eða meira.

Er það óábyrgt af mér að fara með hana í þó það miklu frosti. Ég klæði hana auðvitað vel, hún er í góðum poka og með dúnsæng líka. Við erum úti í u.þ.b. klst.

Stelpumamma.


Sæl, stelpumamma!

Það er ekki óábyrgt af þér að fara með stelpuna út að ganga í stuttan tíma, þó það sé frost úti, enda þótt ekki sé mælt með útisvefni barna í nokkra tíma í frosti. Eins og komið hefur fram í fyrri fyrirspurnum hér á síðunni varðandi útisvefn, skiptir máli hvað það er mikill vindur úti, sem eykur frostgildið, hvort þú ferð út að ganga með barnið eða ekki. Yfirleitt eru mæður ekki úti að spóka sig með barnavagna í hávaðaroki og frosti. Það sköpuðust óvenjulegar aðstæður hérna um daginn, þegar frostið fór upp í allt að -10°C samfara miklum vindi, sem hækkaði frostgildið upp í -35°C.
Mér finnst þú einmitt vera ábyrg mamma að bera þessa fyrirspurn upp.

Gangi ykkur vel.

Kveðja,

Kolbrún Jónsdóttir,
ljósmóðir og hjúkrunarfræðingur,
28. nóvember 2006.

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.