Spurt og svarað

29. júní 2005

Hægðir hjá brjóstmylkingi

Sælar og takk fyrir góðan vef.

Ég á tæplega 8 vikna stelpu sem nærist eingöngu á brjóstamjólk. Frá fæðingu hafði hún hægðir daglega, jafnvel nokkrum sinnum á dag en hægðirnar voru alltaf mjög fljótandi.  Fyrir 2 vikum breyttist þetta þó all snögglega og allt í einu liðu 6 dagar án þess að hún hefði hægðir.
Þegar hún loksins hafði hægðir voru þær ekki eins fljótandi og áður.  Enn líða svo núna alltaf nokkrir dagar á milli hægða.  Nú hef ég lesið að það sé eðlilegt hægðamynstur hjá brjóstmylkingum að hafa annað hvort hægðir oft á dag eða einu sinni í viku og það sé óþarfi að hafa áhyggjur. Spurningin mín er hins vegar þessi.  Hversu margir dagar þurfa að líða milli hægða til að ég þurfi að fara að láta tékka á þessu.  Sem sagt, hver er hámarks fjöldi daga sem líða má milli hægða hjá brjóstmylkingi?

Með fyrirfram þökk, mjólkurmamma.

.............................................................................


Hægðatregða er nánast óþekkt á meðal barna, sem eingöngu nærast á brjóstamjólk. Þess vegna þarftu ekki að hafa stórar áhyggjur af strjálum hægðum dóttur þinnar ef hún er ánægð og þyngist eðlilega. Hins vegar verður mjög oft breyting á hægðalosunarmynstrinu hjá brjóstmylkingi, einmitt um sex vikna aldur barnsins (eins og gerðist hjá dóttur þinni), í þá veru, að hægðir koma sjaldnar en áður. Það er ekki talað um neinar tímatakmarkanir í því sambandi heldur þarf að fylgjast með líðan barnsins, hvort því virðist líða vel s.s. er vært, ánægt og/eða sefur eðlilega. Einnig þarf að fylgjast með, hvort barnið þyngist eðlilega, sem er gert í ungbarnaverndinni. Yfirleitt er auðsótt mál að fá að koma með barn í aukavigtun á heilsugæslustöðina ef mamman hefur einhverjar áhyggjur af þyngdinni. Mér finnst líka eðlilegt, að þú ræðir þetta mál við hjúkrunarfræðinginn þinn í ungbarnaverndinni. Það getur líka örvað þarmahreyfingarnar hjá barninu ef þú lætur hana liggja á maganum stund og stund, þegar hún er vakandi og þú ert hjá henni.

Gangi ykkur vel,

Kolbrún Jónsdóttir,
ljósmóðir og hjúkrunarfræðingur,
29. júní 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.