Spurt og svarað

16. október 2006

Hættur að sofa vel á nóttunni

Nú er það þannig hjá okkur að strákurinn minn sem er fæddur 17. júní á þessu ári er bara allt í einu hættur að sofa vel á nóttunni. Hann sofnar á kvöldin og sefur í svona 1-3 klst en svo er hann að vakna alla nóttina og vill hanga á mér og ef hann hefur ekki brjóstið þá er bara öskrað og hann sefur ekkert. Hvað get ég gert? Ég er ekki tilbúin að láta hann bara gráta eins og margir segja mér að gera en hvernig get ég vanið hann á að sofa lengur í einu á nóttunni og hvernig get ég vanið hann af því að vera alltaf á brjóstinu. Hann hefur mikla sogþörf en vill ekki snuð. Hann notar mig sem snuð, hann hangir á brjóstinu en er samt farin að skila mjólkinni bara afrur, hann sýgur en mjólkin kemur bara útum munnvikið. Hann er ekki svangur.


Sæl og blessuð.

Ég er sammála um að þetta hljómar ekki eins og hann sé svangur. En samkvæmt gömlu reglunni „Ef þú ert í vafa gefðu barninu þá að drekka“. Þá skaltu byrja á því að tryggja það. Teldu saman gjafafjölda yfir sólarhringinn og ef hann er á milli 8 og 12 þá ætti það að nægja. Tryggðu líka að þær séu nógu langar til að hann sé sáttur í lokin. Og að þær séu nógu góðar með því að láta fyrra brjóstið vera mestan hluta gjafarinnar og seinna brjóstið (ef það er notað) bara stutt í lokin. Síðan getur verið gott að reyna að gefa extra vel fyrir nóttina. Fleiri, lengri og betri gjafir að kvöldinu og sjá hvort það dugi til að breyta mynstrinu hans. En eins og þú lýsir vandamálinu þá gæti verið um aðskilnaðarkvíða að ræða. Hann er svo hræddur um að missa þig að hann reynir að halda í þig með því eina vopni sem hann hefur. Svona hegðun byrjar stundum í tengslum við breytingar á háttum fjölskyldunnar t.d. byrjun á pössun, flutninga, meiri fjarveru, flutningur í eigið rúm. Þannig er það að hann heldur áfram að sjúga þótt hann sé ekki svangur þvi að á meðan hann er með vörtuna í munninum þá veit hann að þú ferð ekkert á meðan. Ef um eitthvað slíkt er að ræða reyndu þá að bæta ástandið eins og þú getur og fyrst og fremst gefa honum meira af nærveru þinni.

Vona að þetta hjálpi.

Kær kveðja,

Katrín Edda Magnúsdóttir,
ljósmóðir og brjóstagjafaráðgjafi,
16. október 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.