Spurt og svarað

13. júlí 2010

Er óhætt að nota EGF BIOeffectTM húðdropa á meðgöngu?

Mig langar að athuga hvort þið hafið upplýsingar um þá hvort óléttum konum sé ekki óhætt að nota þessa nýju spennandi húðdropa frá Sif Cosmetics.


Góðan dag!

Við sendum fyrirspurn þína til Sif Cosmetics og fengum svar frá Hilmari Viðarssyni, sérfræðingi (PhD, MSc) hjá Sif Cosmetics:

„Svarið við fyrirspurn þinni er einfaldlega það að sé notkunarleiðbeiningunum fylgt á það að vera algerlega óhætt að nota EGF BIOeffectTM húðdropa á meðgöngu. Þar sem við hjá Sif Cosmetics höfum, enn sem komið er, ekki gert neinar sértækar rannsóknir á áhrifum húðdropanna á þá starfsemi líkamans sem snýr að meðgöngu, þá byggjast ályktanir okkar á þeirri þekkingu sem sérfræðingar okkar hafa um innihaldsefni dropanna. Auk þess eru húðdroparnir unnir í nánu samstarfi við ýmsa sérfræðinga á viðkomandi sviðum, þar á meðal húðlækna og þar af leiðandi eru droparnir þróaðir undir miklu gæðaeftirliti. Það sem einna helst einkennir EGF BIOeffectTM húðdropana er hin tiltölulega einfalda samsetning dropanna. Þeir eru glærir og lyktarlausir og án nokkurra rotvarnarefna eða annarra óþarfa aukaefna. Húðdroparnir innihalda auðvitað frumuvakann EGF (Epidermal Growth Factor), sem er virka efni dropanna og hefur hann  m.a. þau áhrif á frumur húðarinnar að hann spornar gegn náttúrulegu hrörnunarferli hennar. Eitt af megin hlutverkum EGF er að örva frumuskiptingar (/nýmyndun) húðfrumna og þar með framleiðslu kollagens og elastins sem viðheldur stinnleika húðarinnar. Frumuvakinn EGF er viðurkenndur vaxtarþáttur í snyrtivöruheiminum og víða notaður í húðsnyrtivörum í dag. Engar rannsóknir hafa sýnt fram á það að EGF í húðsnyrtivörum hafi óæskileg áhrif á konur á meðgöngu eða fóstrin sem þær ganga með. Þar að auki má geta þess að m.a. Lyfja- og matvælaeftirlit Bandaríkjanna (FDA = Food and Drug Administration) leyfir notkun vaxtarþátta í snyrtivörum þar sem þeir virka staðbundið á þær frumur og þau svæði í húðinni sem þeir eru bornir á, en berast ekki með blóðrásinni til annarra staða í líkamanum.

Að lokum viljum við beina þeim tilmælum til kaupenda að þeir fylgi notkunarleiðbeiningum sem fylgja glasinu og að ef eitthvað kemur uppá eða ef einhverjar spurningar vakna að hafa þá samband við lækni, ljósmóður eða sérfræðinga hjá Sif Cosmetics.“

Vona að þetta svari spurningunni.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
13. júlí 2010.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.