Spurt og svarað

09. mars 2007

Járnþörf ungbarna

Sælar kæru ljósmæður,

Ég hef verið þónokkuð lengi að velta einu fyrir mér sem stangast alveg á við þær "reglur" sem settar hafa verið fram um mataræði ungbarna. Nú varð ég ekki svo heppin með brjóstagjöfina og reyndi margt á fyrstu tvem mánuðum til að koma mjólkurflæðinu í gang. Það endaði með því að við ljósmóðirinn tókum þá ákvörðun að setja barnið alfarið yfir á þurrmjólk
þegar hún var farin að léttast mikið.
Á þurrmjólkurdósinni frá SMA stendur skýrt og greinilega að frá 3-4 mánaða aldri þarf að fullnægja járnþörf barnsins öðruvísi en með þurrmjólkinni. Hvað á þá að gefa ef barnið á ekki að fá að borða fyrr en um 6 mánaða?

Með von um góð svör.



Komdu sæl.

Þetta er virkilega þörf ábending um að SMA fullnægi ekki járnþörf barna eftir 4 mánaða aldur.  Vissulega er SMA ekki eins fullkomin næring eins og brjóstamjólkin.  Börn nýta járnið í þurrmjólkinni ekki eins vel eins og úr brjóstamjólk, meðal annars þess vegna er mælt með brjóstamjólk eingöngu til 6 mánaða og þar af leiðandi er ekki mælt með að börn fari að borða fyrr en við 6 mánaða aldur.  Þar sem það er ekki inn í myndinni hjá ykkur þá er ekkert sem mælir á móti því að við 4 mánaða aldur fari barnið að fá grauta með sem eru líka járnbættir og ætti það þá að fullnægja járnþörfinni þar til þú ferð svo að bæta við fleiri fæðutegundum.

Gangi þér vel.

Rannveig B. Ragnarsdóttir,
hjúkrunarfræðingur og ljósmóðir.
09.03.2007.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.