Sár á bak við eyrað

26.10.2007

Sælar ljósmæður!

Fimm mánaða dóttir mín fær sár á bak við annað eyrað. Við pössum að þurrka vel eftir bað og sund, auk þess sem við höfum notað AD krem, púður o.fl. sem ekki virðist virka. Hafið þið ráð við þessu?

Svo erum við að fara til Spánar með dömuna, þurfum við að huga að einhverju sérstöku fyrir barnið vegna ferðarinnar.

Kærar þakkir frá föður.



Sæll og takk fyrir að leita til okkar.

Það er erfitt að segja hvað þarna er á ferðinni þar sem ég hef ekki séð sárið. En ég ráðlegg ykkur að byrja á því að halda sárinu áfram þurru og leyfa lofti að leika um það. Það hjálpar til við gróandann. Ég ráðlegg ykkur að sleppa því að bera AD-krem á sárið, því húðin getur soðnað undan því. Einnig hindrar það að loft nái að leika um sárið.  Ef þetta ráð dugar ekki ráðlegg ég ykkur að láta lækni líta á þetta, því það er spurning hvort það sé komin einhver sýking í sárið og þurfi þá frekari meðferðar við.

Ég sendi ykkur hér slóð inn á bækling sem er með nokkrum góðum ráðum sem gott er að hafa í huga þegar farið er með börn á sólarströnd. 

Gangi ykkur vel og góða ferð til útlanda.

Kveðja,

Þórdís Björg Kristjánsdóttir,
ljósmóðir og hjúkrunarfræðingur,
26. október 2007.