Spurning

03.04.2008

Ég missti úr blæðingar tvisvar og tók þar af leiðandi heima-þungunarpróf og það kom neikvætt. Ég var búin að taka tvisvar próf, annað að morgni til og hitt um miðjan dag. Það kom alltaf neikvætt svo að ég ákvað að fara til læknis. Ég hef ekki fundið fyrir neinum einkennum óléttu nema tíð þvaglát.Ég fór til læknis og sagði honum þetta og hann setti mig á töflur sem heita Primolut , ég á að taka þær í 10 daga og ef ekki koma blæðingar eftir þann tíma þá á ég að fara til kvensjúkdómalæknis. Ég bjóst við að læknirinn myndi senda þvagprufu í ræktun áður en ég  færi á einhver lyf en hann var mjög mikið að drífa sig og var nánast búinn að ná í næsta einstakling áður en ég var komin út af stofunni. En ég las svo fylgiseðilinn og þar kemur fram að það megi alls ekki taka þetta lyf á meðgöngu og að það þurfi að staðfesta að konan sé ekki þunguð. Ég er núna búin að taka þetta lyf í 4 daga. Ég veit að heimaprófin eiga að vera yfir 90% örugg en maður er alltaf að heyra dæmi um annað. Á ég að halda áfram að taka lyfið og sjá hvort komi blæðingar eða fara til annars læknis og láta senda prufu í ræktun?


Sæl og takk fyrir að leita til okkar.

Það er alveg rétt að þungunarprófin eiga að vera yfir 90 % örugg. Það sem ég ráðlegg þér að gera er að leita til kvensjúkdómalæknis og fá hans álit ef þú ert ekki sátt við þær ráðleggingar sem læknirinn, sem þú fórst til, gaf þér.

Vona að þetta svari spurningu þinni og gangi þér vel.

Kveðja,

Þórdís Björg Kristjánsdóttir,
ljósmóðir og hjúkrunarfræðingur,
3. apríl 2008.