Sveppasýking

03.06.2010

Ég ætla að byrja á því að segja takk fyrir æðislegan vef.

Vandamálið mitt er sveppasýking, ég er búin að nota vivag leggangastíla og hef verið að nota krem við kláða. Mig klægjar ekkert lengur og mér finnst þetta vera nánast alveg horfið, þangað til ég fer að stunda kynlíf með kærastanum mínum. Það er eins og ég upplifi fyrsta skiptið aftur og aftur. Þetta er stundum svo ótrúlega vont að ég segji honum að hætta og önnur skipti þar sem þetta er ekki jafn vont og ég fer að pissa eftir á þá svíður mér svo rosalega í leggöngunum. Er þetta sveppasýkingin ? Er hún ekki farin ennþá?

Kolbrún !


Sæl Kolbrún 

Líklegast er að sveppasýkingin sé ekki búin.  Vivaq stílar eru til að fyrirbyggja sveppasýkingu en ekki til að meðhöndla hana þegar hún er komin.  Þú þarft að fá þér Pevaryl stíla og krem og nota eins og stendur á umbúðunum.  Stílana á kvöldin og krem þrisvar á dag og að minnsta kosti þrjá daga eftir að einkenni eru horfin.  Kærastinn þinn þarf líka á meðferð að halda.  Hann notar þá kremið eins og þú þrisvar á dag og passar að bera vel undir forhúðina (á kónginn allann).

Sveppasýkingin ætti að lagast við þetta en ef ekki þá ættir þú að leita læknis.

Kveðja

Rannveig B. Ragnarsdóttir,
ljósmóðir og hjúkrunarfræðingur.
3. júní 2010.