Spurt og svarað

16. janúar 2006

Sýgur þumalinn, er að verða 4. mánaða

Góðan daginn!

Dóttir mín sem er að verða 4. mánaða hefur aldrei viljað snuð en er farin að taka upp á því að sjúga á sér þumalinn. Er þetta eitthvað sem ég þarf að laga strax eða er þetta bara alveg í lagi (þetta er alla vega voða sætt). Ég vil gjarnan losna við að senda hana í tannréttingar út af þessu en ég hef heyrt marga segja að þetta sé vont fyrir tennurnar og bitið. Eruð þið með einhverja töfralausn til að hún fari að taka snuðið því hún hefur geysimikla sogþörf.

Með fyrirfram þökk.

..............................................................................................


Sæl og blessuð!

Það er staðreynd að mörg börn sjúga þumalinn strax á fósturstigi. Sogviðbragðið er meðfætt og í raun lífsnauðsynlegt til að barnið geti sogið brjóstið eða pela til að fá næringu. Sogþörfin er sterkust fyrstu sex mánuðina en ef börn sjúga fingurna, byrja þau oftast á því á fyrstu þremur mánuðunum (og hafa kannski gert það líka í móðurkviði ). Þetta er alveg eðlilegur hlutur og ekkert sem þú ættir að gera til að koma í veg fyrir það.

Ákveðið hlutfall af börnum heldur þessu áfram næstu mánuðina, flest hætta því að sjálfu sér á fyrsta ári en þau sem halda áfram hætta flest á aldrinum 2-4 ára. Það er ekki talið að þetta hafi slæm áhrif á tannstöðu nema þau sjúgi enn þumalinn eftir tanntöku fullorðinstanna ( 6-7 ára ). Varðandi það að fá börn til að taka snuðið, þá er engin töfralausn við því, sumir prófa allar tegundir á markaðnum en barnið tekur það ekki samt! Það eru skiptar skoðanir á því hvort börn eigi yfirhöfuð að nota snuð en það er a.m.k. ráðlagt að hinkra með það þar til barnið er búið að ná góðu valdi á sogi brjóstsins til að það trufli ekki brjóstagjöfina.

Ég vona að þetta svar hjálpi, gangi þér vel!

Ingibjörg Baldursdóttir,
hjúkrunarfræðingur og brjóstagjafaráðgjafi,
16. janúar 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.