Spurt og svarað

14. október 2005

Vaknar oft á nóttunni

Sæl!

Ég er með einn 3 og hálfs mánaða sem er einungis á brjóstamjólk. Fyrst eftir að hann fæddist svaf hann ágætlega á nóttunni, eða vaknaði kannski 3 sinnum á nóttu. Núna síðast liðnar þrjár vikurnar hefur hann tekið upp á því að vakna nær stanslaust alla nóttina sem veldur því að ekkert okkar sefur. Hann sefur í mesta lagi 2 tíma í senn. Hann grætur smáræðis þegar hann vaknar en samt engin læti í honum bara smá væl og hættir oftast þegar hann kemur á brjóstið. Við reyndum að gefa honum þurrmjólk eitthvert kvöldið til að athuga hvort hann væri svangur en honum fannst hún alveg hræðileg og kyngdi ekki einum einasta sopa.Hann hefur sofið einungis í 2-3,5 tíma í heildina yfir daginn frá fæðingu, þannig að hann er nú ekki að sofa mikið þá heldur. Er frekar áhyggjufull um að hann sofi ekki nóg litla skinnið og hvort það sé eitthvað sem við getum gert til að hjálpa honum. Við værum mjög þakklát fyrir ráðleggingar.

Kveðja, Singing.

...................................................................

Sæl og blessuð Singing.

Eins og komið hefur fram áður á þessari síðu er þessi aldur algengur til umtalsverðra breytinga á háttum barna. Þar við bætist að þau fá (eins og áður) vaxtarspretti á nokkurra vikna fresti en þau bregðast öðruvísi við þeim. Það er algengt að þau grípi til þess ráðs ef þeim gengur illa að fá svarað þörfum sínum yfir daginn að vakna mjög ört upp á næturnar til að drekka. Þetta gengur yfir. Það er hægt að láta það ganga fljótar yfir með því að fjölga gjöfunum yfir daginn og þá sérstaklega rétt fyrir nóttina. Það getur t.d. verið sniðugt að nota skiptigjöf á kvöldin tímabundið (skipta oft um brjóst í gjöfinni). Ég treysti mér ekki til að svara varðandi heildarsvefntíma en bendi þér á að spyrja um það í ungbarnaverndinni. Vona að þetta hjálpi eitthvað,

Katrín Edda Magnúsdóttir,
ljósmóðir og brjóstagjafaráðgjafi,
14. október 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.