Spurt og svarað

13. desember 2008

Fíflarót á meðgöngu

Var búin að senda þessa fyrirspurn áður en fékk ekki svar hér svo að mig langar að gera tilraun númer 2 til þess að spurja um hvort að það megi taka inn fíflarót (dandelion) í hylkjum á meðgöngu og ef ekki hvort að teið sé þá í lagi. Þetta virkar vel við vatnssöfnun í líkamanum. Er eitthvað annað sem er mælt með?


Sæl og blessuð og afsakið hvað svarið kemur seint!

Bæði laufin og rótin af þessu algenga illgresi innhalda ýmis næringarefni s.s. A-vítamín, C-vítamín, járn, kalk og kalíum. Rótin er talin vera góð fyrir lifrina en laufin eru vatnslosandi.

Það er dálítið mismunandi hvað sagt er um notkun fíflarótar á meðgöngu en flestir telja hana örugga á meðgöngu. Þegar fíflarótin er hins vegar komin í hylki flokkast hún líklega sem náttúrulyf og það þarf alltaf að fara varlega í að taka inn lyf á meðgöngu, líka náttúrulyf. Mannslíkaminn er mjög fullkomin en að sama skapi flókinn og því geta efni sem tekin eru inn haft jákvæð áhrif á vissa líkamsstarfssemi en neikvæð áhrif á aðra. Þegar tekin eru inn hylki þá er yfirleitt verið að neyta jurtarinnar í hlutfallslega stórum skömmtum en það getur verið varasamt, sérstaklega á meðgöngu.

Það gildir allt annað um að borða jurtina eins og hún kemur fyrir eða drekka te sem unnið eru úr jurtinni. Ég myndi telja að það væri í góðu lagi að drekka te úr fíflarótum en gæta þó hófs.

Þú getur svo kíkt á fyrirspurn um bjúg þar sem talað er um vatnslosandi aðferðir.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
13. desember 2008.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.