Fontex á meðgöngu

14.02.2007

Nú ætlum við skötuhjúin að fara að reyna að eignast barn, málið er hins vegar það að ég er á fontex og læknirinn minn vill helst ekki að ég hætti að taka það, enda verð ég nánast óvinnufær í kvíðaköstum ef ég nota það ekki en líður mjög vel noti ég það. spurningin er sem sagt hvort að eitthvað sé þekkt með þetta lyf.


Sæl og blessuð og takk fyrir að leita til okkar!

Ég mæli með því að þú ræðir fyrirhugaðar barneignir við lækninn þinn og hvort ávinningur þess að halda áfram að taka inn þetta lyf sé meiri en hugsanleg áhætta. Samkvæmt þeim upplýsingum sem ég fann í Sérlyfjaskránni á vef Lyfjastofnunar bendir margt til þess að notkun lyfsins á meðgöngu valdi ekki vansköpun. Þar segir að nota megi lyfið á meðgöngu, en gæta skuli varúðar, sérstaklega á seinnihluta meðgöngu eða skömmu fyrir fæðingu því dæmi eru um eftirfarandi einkenni hjá nýburum: óværð, skjálfti, slekja, mikill grátur, erfiðleikar með að sjúga eða sofa.

Gangi ykkur vel.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
14. febrúar 2007.