Spurt og svarað

12. mars 2011

Æðahnútar - Hirudoid

Sælar og takk kærlega fyrir vefinn.

Núna á ég von á mínu þriðja barni og er komin inní viku 20. Ég hef ætíð barist við æðahnúta, þetta er í fjölskyldunni, fór einu sinni í aðgerð áður en ég átti börnin mín. Versnaði við báðar fyrri meðgöngur en er sérstaklega slæm núna. Hef notað kremið Hirudoid og það reynst mér vel. Núna var ég að taka eftir að hnútarnir leita uppá við og öðru megin eru þeir komnir alveg upp við skapbarmana. Frekar óþægilegt. Má nota Hirudoid alveg upp við skapbarmana á æðahnúta? Á ég í meiri hættu að fá gyllinæð, er það tengt æðahnútum. Er líka að nota stuðningssokka upp að hnjám. Er eitthvað annað sem að ég gæti verið að gera gagnlegt?

Með von um skjót svar og fyrirfram þökk, ein áhyggjufull.


Sæl og blessuð!

Hirudoid kremið má ekki komast í snertingu við slímhúð svo það þarf að fara varlega í að nota það upp við skapabarmana. Þú ættir að ráðfæra þig við lækni um þetta.

Því miður er það þannig að þeir sem hafa tilhneigingu til að fá æðahnúta hafa líka meiri tilhneigingu til að fá gyllinæð svo þú ættir að reyna að koma í veg fyrir hægðatregðu sem getur ýtt undir myndun gyllinæðar, sjá t.d. þessa fyrirspurn.

Svo koma nokkur ráð sem geta dregið úr frekari myndun æðahnúta

  • Regluleg hreyfing, t.d. ganga. Þetta bætir blóðflæði í fótunum og styrkir blóðrásarkerfið.
  • Forðast að standa of lengi.
  • Hvíla sig reglulega með tærnar upp í loft (sérstaklega eftir að staðið er lengi)
  • Forðast of mikla þyngdaraukningu
  • Klæðast þægilegum fötum og skóm sem ekki þrengja of mikið að
  • Ekki krossleggja fætur þegar setið er

Vona að þetta hjálpi eitthvað.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
12. mars 2011.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.