Grindarverkir

20.04.2007

Sælar ágætu ljósmæður og takk fyrir góð ráð.

Ég er komin 36 vikur og geng með mitt fjórða barn. Meðgangan hefur gengið
vel, fyrir utan vaxandi verki neðst í legi og í lífbeininu. Ég hef fundið
mikinn þrýsting niður frá svona á miðri meðgöngunni sem ágerast eftir sem
líður á daginn. Nú er þetta þannig að ég á mjög bágt með gang, get ekki
beygt mig niður, get illa haft fæturnar saman, sit td. mjög gleið og geng
líka þannig. Sviðinn er mikill í lífbeininu og jafnvel líka þegar ég ligg.
Ljósmóðirin mín telur að um grindarverki sé að ræða og að þeir gangi til
baka eftir fæðinguna. Mig langar til að spyrja ykkur út í þetta ástand. Er
eitthvað hægt að gera til að líða betur og líka hvort þetta hafi áhrif í
fæðingunni sjálfri?

Kær kveðja og þakkir.


Komdu sæl

Þetta hljómar eins og grindarverkir og það er rétt að þeir ganga til baka eftir fæðinguna.  Það er ýmislegt hægt að gera til að láta sér líða betur og hvíld er eitt af því.  Forðast stiga og að bera þunga hluti.  Passa upp á líkamsstellingar við alla hreyfingu en líka þegar þú liggur, hafa kodda milli lappanna og vera á snúningslaki.  Meðgöngusund hefur reynst mörgum konum með grindarverki mjög gott en einnig er hægt að fara í sjúkraþjálfun ef þú ert mjög slæm og getur fengið tilvísun frá lækni. 

Þú kemur ekki til með að finna neitt fyrir þessu í fæðingunni, en það er sjálfsagt að segja ljósmóðurinni sem tekur á móti frá þessu.

Gangi þér vel.

Rannveig B. Ragnarsdóttir,
ljósmóðir og hjúkrunarfræðingur.
20. apríl 2007.