"nenni" ekki í vinnuna

11.01.2015

Sæl.
Ég er komin 21 viku og ég finn endalaust fyrir þreytu og ég nenni ekki í vinnuna því mig langar bara til að sofa eða vera heima og gera ekkert. Ég er í 2 vinnum og hef alltaf verið rosalega dugleg manneskja og finnst því skrítið að ég "nenni" ekki vinnunni minni. Ég vinn á leikskóla og það er náttúrulega mikið álag þar. Hvað er best fyrir mig að gera til þess að komast uppúr þessu og "nenna" í vinnuna?



Sæl og blessuð, já nú er úr vöndu að ráða. Það eru mjög miklar líkamlegar breytingar sem að eiga sér stað á meðgöngunni og mikið að gerast inni í þér svo að það er út af fyrir sig ekkert skrýtið að það reyni á og að þú sért þreyttari en annars. Ég mundi ráðleggja þér að tala við þína ljósmóður og fá úr því skorið að allt sé eðlilegt líkamlega og ef ekki finnst skýring á þessari þreytu þá að fara að skoða hvort að þú gætir mögulega verið með þunglyndi ef til vill tengt skammdeginu eða meðgöngunni. Það er mikilvægt að nota tímann sem eftir er af meðgöngunni til að vinna í að komast yfir þetta og vera komin í þitt eðlilega form þegar barnið fæðist.

með góðri kveðju
Áslaug Valsdóttir
ljósmóðir og hjúkrunarfræðingur
11. jan. 2015